Njoftimi në çastet e fundit të merkatos për kalimin zyrtar të Federico Chiesës te Juventusi ka shkaktuar një reagim të ashpër të tifozëve të Fiorentinës.
Fansat e klubit vjollcë reaguan njëlloj si për Bernardeschin, që u konsiderua tradhtar kur zgjodhi bardhezinjtë në vitin 2017.
“Tradhtia ndaj atyre që ju rritën dhe ju mbrojtën është mungesë e madhe respekti. Firenze nuk është më shtëpia juaj … mosmirënjohës!”.
Kështu shkruhet në banderolën e varur jashtë stadiumit “Artemio Franchi” nga tifozët e Fiorentinës pas lamtumirës zyrtare të Chiesës.
Një goditje në zemër që erdhi në momentin e fundit, kur shpresat e tifozëve vjollcë për ta parë Federicon përsëri në Firence ishin bërë më konkrete.
“Sulmi” i fundit i Paraticit rezultoi i suksesshëm, Commisso e pranoi ofertën e Juventusit për Chiesën, duke nxitur protestën e mbështetësve më të zjarrtë të Fiorentinës.
