Prokuroria e Posaçme Antikorrupsion ka filluar marrjen në pyetje të të gjithë personave të përshirë në çështjen e shembjes së godinës së Teatrit Kombëtar mëngjesin e 17 majit.
godina-e-shembur-e-teatrit-kombetar
SPAK e ka nisur procedurën duke marrë në pyetje fillimisht avokaten Adriana Kalaja, e cila është një nga personat që ka dorëzuar padi në SPAK për procedurat që janë ndjekur nga qeveria dhe Bashkia Tiranë para dhe pas shembjes së godinës historike. Pas avokates Kalaja do të merren në pyetje edhe personat e tjerë të përfshirë në këtë çështje. Ndërkohë mësohet se SPAK ka bërë shkrirje të gjashtë padive që janë dorëzuar nga Aleanca për Mbrojtjen e Teatrit. Padi në SPAK ka depozituar edhe Presidenti Meta gjatë muajit maj. Hetimet për shembjen e godinës së Teatrit nisën më 21 maj dhe prokurori i çështjes, Ervin Kondilli, sekuestroi dokumentet nga Bashkia Tiranë për procedurën e ndjekur për shembjen e godinës së Teatrit Kombëtar dhe asaj të Teatrit Eksperimental “Kujtim Spahivogli”.
PRESIDENTI
Pas nisjes së marrjes në pyetje të personave të përfshirë në çështjen e shembjes së Teatrit Kombëtar reagoi Presidenti Meta. Ky i fundit, shembjen e Teatrit Kombëtar bashkë me dëmtimin e vlerave arkeologjike në Durrës i cilësoi si krime që nuk do mund të amnistohen dhe theksoi se shumë shpejt do të vijë koha për drejtësi.
“Akti taleban i shembjes së Teatrit Kombëtar, shkatërrimi i shumë vlerave unikale arkeologjike në Durrës dhe dëmtimi i disa monumenteve në mbarë vendin janë dëshmitë ulëritëse më të freskëta se si arroganca, korrupsioni dhe papërgjegjshmëria e një pushteti mund të sjellë dëme të pariparueshme për trashëgiminë tonë kombëtare e kulturore, pjesë e trashëgimisë europiane.
Të gjitha këto krime të rënda kushtetuese, ligjore dhe morale, të konsumuara veçanërisht në Tiranë dhe Durrës, ku dëmet kanë qenë të jashtëzakonshme, do të jenë të paamnistueshme! Sepse këto akte barbarie, për më tepër të kryera nga institucionet shtetërore, janë sulme të drejtpërdrejta ndaj identitetit tonë kombëtar.
Ndaj, sot, në Ditën Kombëtare të Trashëgimisë Kulturore, i garantoj të gjithë shqiptarët se gjithçka është mbajtur shënim dhe askush nuk ka për t’i shpëtuar drejtësisë. Duke kujtuar profesor Paolo Vittin, i cili me të drejtë thotë se: “Europa nuk është vetëm euro, por edhe kulturë, solidaritet, humanizëm dhe identitet”, risjell edhe një herë në vëmendje qëndrimin e “Europa Nostra” në lidhje me shembjen e Teatrit Kombëtar: “Le të jetë kjo ngjarje e mjerueshme ajo që do të shënojë fillimin e një zgjimi të vërtetë të shoqërisë civile në Shqipëri, të udhëhequr nga artistë dhe intelektualë”. Barbaria dhe talebanizmi nuk kanë vend në shoqërinë tonë. Koha për drejtësi!”, shkroi Meta.
KREU I PD
Duke kujtuar Ditën Ndërkombëtare të Trashëgimisë Kulturore, kreu i PD-së, Lulzim Basha, ka vënë theksin te shembja e Teatrit Kombëtar. Për liderin e opozitës, ai akt është një dëshmi e urrejtjes së qeverisë ndaj vlerave dhe se ata që e kryen atë do të mbajnë përgjegjësi para drejtësi.
“Këtë vit, Dita Ndërkombëtare e Trashëgimisë Kulturore e gjen Shqipërinë pa Teatrin Kombëtar, që u shemb nga regjimi si dëshmi e barbarisë dhe urrejtjes që kjo qeveri ushqen për vlerat dhe institucionet e kombit tonë. Teatri Kombëtar nuk ishte thjesht një institucion i kulturës dhe një gjurmë elegante e trashëgimisë sonë. Falë rezistencës së artistëve, aktivistëve, intelektualëve dhe qytetarëve të Tiranës, ai u shndërrua në një vijë ndarëse ndërmjet regjimit dhe qytetarisë. Rikonfirmoj angazhimin tim personal dhe të Partisë Demokratike se Teatrin Kombëtar do ta rindërtojmë siç ishte, aty ku ishte dhe ata që e sulmuan dhe e shembën brutalisht do të dalin përpara drejtësisë për këtë krim të rëndë ndaj kulturës, qytetarisë dhe mënyrës tonë të jetesës”, shkroi Basha./panorama
