Ministria e Shëndetësisë nuk ka raportuar asnjë rast të ri pozitiv për Covid-19 në qytetin e Durrësit.
Gjatë raportimit të sotëm nga ana e ministrisë u raportuan raste pozitive vetëm në qytetet Tiranë, Shkodër, Elbasan, Delvinë, Krujë, Kukës, Lezhë, Sarandë.
Por qyteti i Durrësit ka 201 raste aktive me koronavirus.
Në fakt ditën e djeshme u mësua se Drejtoria e Shëndetit Publik në këtë qytet ka pezulluar punën, pasi ka patur staf të personelit të saj, që janë infektuar nga Covid-19.
Pas konfirmimit të rasteve pozitive në këtë institucion, personeli i kësaj Drejtorie është karantinuar.
Deri ditën e djeshme kjo drejtori ka qenë në pritje të një vendimi nga ana e Ministrisë së Shëndetësisë, se si do të procedohet në vazhdim në këtë qytet, për gjurmimin dhe hetimin e rasteve të dyshuara me koronavirus.
Me sa duket Ministria e Shëndetësisë ende nuk ka vendosur se si do të gjurmohen dhe hetohen rastet në këtë qytet, i cili renditet pas Tiranës si vatër e rrezikshme infeksioni.