Biznesmeni Arben Frroku, vëllai i ish-deputetit Mark Frroku i ka shpëtuar burgimit të përjetshëm. Gjykata holandeze e ka dënuar me 18 vite burgim. Atij do ti njihen edhe ditët e burgut që ka kryer në Shqipëri dhe Greqi. Drejtësia shqiptare e kishte dënuar atë me burgim të përjetshëm për vrasjen e kryekomisarit Dritan Lamaj në vitin 2013.
Sipas gazetës holandeze “De Telegraaf”, Gjykata e Amsterdamit ka vendosur ndaj tij dënimin me 18 vite burgim. Lajmi është konfirmuar edhe nga avokati i Arben Frrokut, Gerald Roethof, i cili ka thënë se në Holandë “nuk mund të aplikohen të njëjtat vendime të gjykatave të huaja për shtetasit e huaj”, raporton “De Telegraaf”.
Arben Frroku u arrestua në Holandë në Prill të vitit 2016 me dokumente të falsifikuara greke me identitetin Renato Xhepa. Ai u kap në provincën Shiphol pranë aeroportit ndërkombëtar të Amsterdamit. Pas arrestimit të tij, ka patur një proces të gjatë gjyqësor për ekstradimin e Frrokut drejt Shqipërisë. Përfundimisht, Gjykata e Apelit në qytetin e Hagës vendosi që të mos ekstradojë Arben Frrokun në Shqipëri, me argumentimin se procesi gjyqësor mund të ketë qenë i ndikuar politikisht. Pas rrëzimit të ekstradimit, Ministria shqiptare e Drejtësisë ka kërkuar që dënimi të zbatohet në Holandë.
Si u arratis
Në 12 shkurt të vitit të kaluar Holanda refuzoi ekstradimin e tij në Shqipëri. Sipas vendimit të refuzimit shkak për mos ekstradimin e Arben Frrokut ishte bërë përfshirja e politikës në procesin ndaj tij si dhe rrezikimi i jetës në Shqipëri, pasi ai është i dënuar përjetë për një krim që pretendon që nuk e ka kryer. Për akuzën e vrasjen së Dritan Lamaj Arben Frroku fillimisht mori pafajësi nga Gjykata e Shkallës së Parë për krimet e rënda. Pas këtij vendimi ai u largua nga Shqipëria nëpërmjet Malit të Zi.
Më tej prokuroria ankimoi vendimin dhe Apeli i Krimeve të Rënda e dënoi Arben Frrokut me burgim të përjetshëm duke e ribërë sërish njeriun më të kërkuar për vrasjen e kryepolicit. Prej atij momenti Arben Frroku qëndroi jashtë vendit deri sa u arrestua në Holandë me dokumente false greke. Rekursi i tij në Gjykatën e Lartë dhe Kushtetuese nuk u pranua duke lënë në fuqi dënimin me burg përjetë.
