Po mbahet sot seanca e Kuvendit të Kosovës ku do të shqyrtohet mocioni i votëbesimit për rrëzimin e Qeverisë Kurti. Ky mocion është iniciuar nga Lidhja Demokratike e Kosovës, e cila edhe vetë është pjesë e Qeverisë.
Kreu i Qeverisë, Albin Kurti nuk do të marrë pjesë në seancë, raporton “Zeri.info”. Kështu kanë bërë të ditur nga Qeveria e Kosovës, të cilët nuk kanë dhënë më shumë detaje për këtë veprim të Kurtit.
Ndërkohë me heret, Kurti ka bërë të ditur se kanë dërguar një reagim lidhur me kërkesën e presidentit me të cilën iu është drejtuar Gjykatës Kushtetuese.
Këtë nismë të LDK-së nuk e kanë përkrahur të gjithë anëtarët e LDK-së. Në mbledhjen e Kryesisë së LDK-së, mocionin e ka kundërshtuar, Kryetarja e Kuvendit Vjosa Osmani, Ministri i Infrastrukturës, Lumir Abdixhiku dhe disa deputetë të LDK-së. Madje, gjatë ditës së djeshme, Kryeparlamentarja u ka bërë thirrje të gjithë deputetët të votojnë kundër mocionit.
Kujtojmë se ky vendim i LDK-së ka ardhur pas shkarkimit të Agim Veliut nga pozita e ministrit të Punëve të Brendshme.