Vetëm pak ditë pasi në internet u shpërnda një projekt shumë i komentuar i Nathan Fielder, ku përfshihej sipërmarrësja e teknologjisë mjekësore dhe e dënuara për mashtrim Elizabeth Holmes, një tjetër teaser me atmosferë shqetësuese, i lidhur me botën e Silicon Valley, ka tërhequr vëmendjen.
Të lidhura
None found
Neon ka publikuar pamjet e para të filmit biografik “Artificial”, i xhiruar pjesërisht në San Francisco. Filmi trajton shkarkimin e shefit ekzekutiv të OpenAI, Sam Altman, në vitin 2023, si dhe rikthimin e tij në këtë post vetëm pesë ditë më vonë. Edhe pse traileri nuk jep shumë detaje mbi subjektin, atmosfera e errët dhe apokaliptike lë të kuptohet se bëhet fjalë për një dramë larg toneve të lehta.
Teaseri 77-sekondësh e paraqet Altmanin, të interpretuar nga Andrew Garfield, duke kaluar në oborrin e rezidencës së tij minimaliste, pranë disa burrave me Speedo që marrin rreze dielli ose ushtrohen. Më pas, teksa zbret në një bunker shumëngjyrësh të konceptuar për fundin e botës, ku armët shihen hapur nëpër kuti, skena merr një karakter edhe më të zymtë. Personazhi i Altmanit, i luajtur nga Garfield, shprehet: “Vendet do të bien. Industritë do të shemben.”
“Dhe ne do të jemi ata që do t’i udhëheqin njerëzit drejt kësaj bote të re”, vijon zëri i tij. “Jam shumë i emocionuar ta shoh.”
Ndërsa rivaliteti për zhvillimin e inteligjencës artificiale bëhet gjithnjë e më i fortë, brenda industrisë po rriten edhe paralajmërimet se kjo teknologji mund të përbëjë kërcënim për mbijetesën e njerëzimit. Këto shqetësime po dalin gjithnjë e më shpesh në publik. Të martën, studiuesi kryesor i Anthropic për përputhjen e inteligjencës artificiale me objektivat njerëzore, i njohur si AI alignment, shkroi në X se kompania beson “seriozisht” se inteligjenca artificiale do t’i vrasë të gjithë njerëzit. Deklarata ishte një përgjigje ndaj një postimi viral të një ish-punonjësi, i cili kishte dhënë dorëheqjen pasi mendonte se kompania nuk po e trajtonte me seriozitetin e duhur këtë rrezik.
Filmat mbi industrinë e teknologjisë që pritet të shfaqen këtë vit duket se po pasqyrojnë pikërisht këtë frikë ekzistenciale, duke vënë në qendër pasojat shkatërruese që kjo fushë mund të ketë për shoqërinë. Dokumentari i Nathan Fielder për Holmes, i realizuar nga A24 dhe i titulluar “You Can See Everything”, fokusohet te ditët e fundit të ish-themelueses së Theranos përpara nisjes së vuajtjes së dënimit me 11 vjet burg.
Një tjetër prodhim, “The Social Reckoning”, është vazhdimi i filmit “The Social Network” të vitit 2010. Ndërsa vepra e parë rrëfente ngjitjen e Mark Zuckerberg-ut përmes Facebook-ut dhe konfliktin me mikun dhe bashkëthemeluesin Eduardo Saverin, sërish të interpretuar nga Garfield, filmi i ri ofron një paraqitje më të errët të kompanisë.
Filmi i parë u përqendrua kryesisht te pasiguria e një Zuckerberg-u të ri dhe gabimet e tij të hershme si drejtor ekzekutiv. Ndërkohë, vazhdimi mbështetet te historia pas serisë hetimore të Wall Street Journal të vitit 2021, “The Facebook Files”. Ajo seri zbuloi, ndër të tjera, se kompania e dinte që produktet e saj po dëmtonin fëmijët, por bëri pak për ta parandaluar këtë.
Drejtuesit e teknologjisë që janë portretizuar në filma kanë reaguar në mënyra të ndryshme. Zuckerberg-u ka kritikuar vazhdimisht saktësinë e filmit të vitit 2010, duke thënë publikisht se e vetmja gjë që dukej se ishte paraqitur saktë ishte stili i tij, ose mungesa e një stili të tillë. Reagimi i tij ndaj filmit të ri mund të jetë më i ashpër, pasi kompania sapo ka mbyllur një proces gjyqësor me vlerë rekord prej 18 miliardë dollarësh, të lidhur me të njëjtat pretendime që duket se trajtohen në këtë produksion.
Sam Altman nuk ka bërë deri tani ndonjë koment publik për teaser-in e “Artificial”. Megjithatë, vëllai i tij ka reaguar tashmë.
“Shikoni, të gjithë e dini se nuk do të doja asgjë më shumë sesa një film të metrazhit të gjatë që tallet me vëllain tim”, shkroi Jack Altman në një postim në X. “Fatkeqësisht, bazuar në pamjen paraprake, duket se e vetmja gjë që e kanë kapur saktë është mënyra si ecën.” /DPA News/
