Dino Zoff, ish-portieri legjendar i Juventusit, ka dhënë disa deklarata në edicionin e radhës të “Il Giornale”, duke komentuar situatën aktuale të ekipit bardhezi.
“Ndaj Empolit ishte një natë e keqe, tifozët mbetën të hidhëruar, por ne jemi ende në garë për kampionat. E them këtë sepse Juventusi është pjesë e pandashme e jetës sime”, tha Zoff, duke shprehur solidaritet me ekipin, pavarësisht vështirësive të fundit.
Duke folur për Thiago Mottën, ish-portieri theksoi rëndësinë që një trajner të ketë lirinë për ta shprehur veten siç mendon: “Një trajner duhet të ketë të drejtën ta shprehë veten siç e mendon më mirë. Motta e ka bërë këtë me ndershmërinë intelektuale të atij që nuk kërkon justifikime. Pastaj, futbolli është i bukur sepse është i paparashikueshëm, sikurse ndodhi ndaj Empolit”.
Zoff dha mendimin e tij për daljen nga kjo situatë: “Për t’u rikthyer në formë, duhet durim dhe të gjenden motivimet brenda ekipit për t’u ngritur. Jam optimist, ekipi është i ri dhe cilësia nuk mungon. Me më shumë pjekuri, në të ardhmen do të shohim një Juventus në nivelin e traditës së tij. Në të tashmen duhet të konsolidojmë kualifikimin në Champions”.
Në fund, ai foli përsëri për Mottën: “Është një trajner i shkëlqyer, i ri. Edhe ai duhet të krijojë eksperiencë”.
