Pas largimit nga Barcelona në maj 2024, Xavi nuk është rikthyer ende në stol, por idetë e tij për të ardhmen janë të qarta. Në një intervistë ekskluzive për The Athletic, ish-mesfushori dhe trajneri i katalanasve zbuloi dëshirën e tij për t’u transferuar në Premier League, duke vënë theksin te mjedisi dhe vizioni afatgjatë i klubeve.
“Nuk jam me nxitim, por do të doja një projekt serioz, ku të më thonë: ‘Ke katër vjet për të punuar dhe për të zhvilluar një ide’ – shpjegoi ai -. Do të doja të isha trajner në Premier League, atje ka një pasion të vërtetë. Në Spanjë ka rëndësi vetëm rezultati”.
Xavi drejtoi Barçën nga nëntori 2021 deri në maj 2024, duke fituar një titull në La Liga dhe një Superkupë të Spanjës. Para se të kthehej në Camp Nou, ai kishte fituar edhe disa trofe në krye të Al-Sadd, në Katar.
Por pavarësisht sukseseve, trajneri spanjoll nënvizoi se sa e vështirë është të përballosh presionin në shtëpi, veçanërisht në vende si Barcelona apo Madridi. “Vetëm shikoni se çfarë ndodh me Ancelottin, i kritikuar pavarësisht se ka fituar 30 tituj në dhjetë vjet. Siç tha Valverde: nëse e kritikojnë atë, çfarë shprese kemi ne të tjerët?”, deklaroi ai.
Jo vetëm klubet, ish-mesfushori i kombëtares spanjolle, kampion bote në vitin 2010 dhe dy herë kampion evropian (2008 dhe 2012), nuk përjashton një punë si trajner i një ekipi kombëtar në të ardhmen. “Do të doja të isha trajner i një ekipi kombëtar. Kur ëndërroja të bëhesha trajner, imagjinoja të fitoja një Botëror apo një kampionat evropian. Spanja? Pse jo? Por nuk kam obsesione. Tani për tani jam mirë kështu, shikoj shumë futboll dhe jam me familjen time”.
