Real Madridi e hapi sezonin e ri të Ligës së Kampionëve me një fitore 2-1 ndaj Interit në “Santiago Bernabeu”, por sfida u shoqërua edhe me një episod të veçantë, të lidhur me rregulloren e re për zëvendësimet.
Kylian Mbappe dhe Federico Valverde ishin autorët e golave për skuadrën madrilene, ndërsa Carlos Augusto shënoi për Interin në pjesën e dytë. Megjithatë, në fund të takimit vëmendja u përqendrua te një situatë tjetër.
Të lidhura
None found
Vinicius Junior duhej të zëvendësohej në minutën e 87-të nga Alvaro Carreras, por braziliani nuk arriti të largohej nga fusha brenda afatit prej 10 sekondash të parashikuar nga rregulli i ri.
Sipas dispozitës së re, lojtari që po zëvendësohet duhet të dalë nga fusha brenda 10 sekondave. Në rast se ai tejkalon këtë kohë, futbollisti që do të hyjë në lojë nuk mund të aktivizohet menjëherë dhe duhet të presë ndërprerjen e ardhshme të ndeshjes.
Për këtë arsye, Carreras u detyrua të qëndronte jashtë për disa çaste, ndërsa Real Madridi luajti përkohësisht me vetëm dhjetë futbollistë. Rasti i Viniciusit përbën një nga zbatimet e para konkrete të mënyrës se si rregulli i ri mund të ndikojë në ndeshjet e Ligës së Kampionëve.
