Vinicius pret shpërblimin nga Ancelotti pas bastit të fituar me golin me kokë

Vinicius Jr ka treguar se është në pritje të një dhurate të veçantë nga Carlo Ancelotti, pasi arriti të bëjë realitet diçka që trajneri e kishte quajtur “të pamundur” në fitoren e thellë të Brazilit ndaj Skocisë.

Në ndeshjen ku Brazili vulosi vendin e parë në Grupin C dhe kualifikimin për në fazën me eliminim direkt të Kupës së Botës, sulmuesi i Real Madridit ishte figura më e spikatur në fushë.

Edhe pse brazilianët fituan pa vështirësi në Miami, në qendër të vëmendjes pas takimit ishte pikërisht Vinicius, i cili zbuloi se kishte vendosur një bast privat me trajnerin e tij.

Ai realizoi golin e parë të sfidës dhe më pas shtoi edhe një tjetër para përfundimit të pjesës së parë, ndërsa pikërisht goli i dytë, i shënuar me kokë, u kthye në temë humori pas ndeshjes.

Pas përfundimit të takimit, anësori brazilian bëri të ditur se Ancelotti nuk besonte se ai do të arrinte të shënonte me kokë.

“Nuk jam i shqetësuar për statistikat, por për të bërë punën time sa më mirë dhe për të ndihmuar Brazilin”.

“Jam shumë i lumtur për golat. Sot shënova edhe me kokë, diçka që ia kisha premtuar trajnerit. Ai më tha se ishte pothuajse e pamundur dhe se, nëse do ta bëja, do të më blinte një dhuratë. Tani do të pres”, deklaroi Vinicius me buzëqeshje.

Veç bastit miqësor me Ancelottin, paraqitja e Viniciusit e renditi atë edhe mes emrave të veçantë në historinë e Brazilit.

Me golin e realizuar në Miami, ai u shndërrua në futbollistin e tetë të Brazilit që shënon në çdo ndeshje të fazës së grupeve në një edicion të vetëm të Kupës së Botës, duke përsëritur një arritje që më herët është regjistruar nga disa prej legjendave më të mëdha të futbollit brazilian.

Tashmë që Brazili e mbylli grupin në vendin e parë, ekipi i drejtuar nga Ancelotti po paraqitet si një nga kandidatët më të fortë për të fituar Botërorin 2026.