Transferimi për 125 milionë euro, por me një kusht të pazakontë në marrëveshjen për Diomanden

RB Leipzigu ka përfshirë një kërkesë të veçantë në marrëveshjen për transferimin e Yan Diomandes te Real Madridi, duke ndjekur kështu një model që klubi gjerman e ka përdorur edhe në disa shitje të rëndësishme të mëparshme.

Real Madridi do të paguajë 125 milionë euro si shumë fikse për Diomanden, ndërsa me bonuset e parashikuara, vlera përfundimtare e transferimit mund të arrijë në 140 milionë euro. Ky është operacioni më i kushtueshëm i realizuar ndonjëherë nga Leipzigu.

Sipas “BILD”, marrëveshja përmban edhe detyrimin që Real Madridi të luajë një ndeshje miqësore kundër Leipzigut në të ardhmen.

Ende nuk ka një datë të caktuar për këtë përballje, por ajo është bërë pjesë e kushteve të transferimit. Në këtë mënyrë, largimi i Diomandes mund ta rikthejë skuadrën madrilene në “Red Bull Arena”, këtë herë për një takim miqësor.

Edhe pse një klauzolë e tillë mund të tingëllojë e pazakontë, Leipzigu nuk po e përdor për herë të parë. Në të kaluarën, klubi ka vendosur kushte të ngjashme në disa prej marrëveshjeve të tij më të mëdha.

Në disa prej këtyre rasteve, ndeshjet miqësore janë zhvilluar, ndërsa kur ato nuk janë organizuar, Leipzigu ka marrë kompensim financiar.

Edhe në marrëveshjen për Diomanden, klubi gjerman duket se ka parashikuar të dyja mundësitë.

Nëse palët dakordësojnë një datë, Real Madridi do të udhëtojë drejt “Red Bull Arena” për të luajtur miqësoren e planifikuar.

Për Leipzigun, një takim i tillë do të krijonte mundësinë për të organizuar një event të madh me një prej klubeve më të njohura në botë, duke siguruar të ardhura nga biletat, shërbimet dhe aktivitetet komerciale.

Në rast se nuk gjendet një datë e përshtatshme për të dyja skuadrat, “BILD” raporton se Leipzigu do të marrë një shumë të garantuar prej rreth 1.3 milionë eurosh.

Kjo pagesë nuk do t’i shtohet shumës fikse prej 125 milionë eurosh. Sipas raportimit, 1.3 milionë euro janë përfshirë në paketën e bonuseve, e cila mund ta rrisë vlerën totale të transferimit deri në 140 milionë euro.

Marrëveshja nuk parashikon përqindje për një shitje të ardhshme të lojtarit. Për këtë arsye, të ardhurat e mëtejshme të Leipzigut nga Diomande duket se do të kufizohen te bonuset e përcaktuara në kontratë.