Real Madridi shtyn përkohësisht transferimet e Diomandes dhe Rodrit për arsye të ndryshme

Real Madridi po punon për të përmbyllur një merkato të bujshme me afrimin e sulmuesit anësor Yan Diomande dhe mesfushorit Rodri, por finalizimi i këtyre dy operacioneve është vonuar.

Sipas mediumit Diario AS, klubi madrilen ka ndalur përkohësisht procedurat për lojtarin e RB Leipzig dhe për mesfushorin e Manchester Cityt, për shkaqe të ndryshme në secilin rast.

Për Diomanden, pengesa lidhet me disa mospërputhje të vogla në klauzolat specifike të marrëveshjes. Megjithatë, kontrata pesëvjeçare me futbollistin tashmë është mbyllur plotësisht.

Klubi spanjoll synon t’i përfundojë sa më shpejt çështjet dokumentare, në mënyrë që lojtari i kombëtares së Bregut të Fildishtë të nisë stërvitjet me Jose Mourinhon përpara fundit të kësaj jave.

Ndërkohë, bisedimet e para me Manchester Cityn për Rodrin janë shtyrë për shkak të nevojës për të trajtuar largimet nga skuadra. Pavarësisht kësaj, interesi i Real Madridit për fituesin e Topit të Artë të Kupës së Botës 2026 mbetet i plotë.

Rodri kishte qenë fillimisht objekt diskutimesh të brendshme në Valdebebas, por paraqitjet e tij të jashtëzakonshme në Kupën e Botës i bindën drejtuesit e klubit të japin miratimin për një transferim me vlerë 100 milionë euro.

Mungesa e presidentit ka shkaktuar shtyrjen e prezantimeve të futbollistëve, ndërsa të gjitha përforcimet e kësaj vere pritet të prezantohen së shpejti dhe mund të luajnë për herë të parë kundër Fiorentinës.