Afati kalimtar nuk nis të përgatitet vetëm kur hapet zyrtarisht dritarja e transferimeve. Klubet e futbollit e fillojnë planifikimin menjëherë pas përfundimit të afatit dimëror, duke angazhuar skautë, drejtorë sportivë, analistë të të dhënave dhe agjentë.
Të lidhura
None found
Klubet e Ligës Premier kanë shpenzuar deri tani këtë verë më shumë se 1.16 miliardë euro. Ndër lëvizjet rekord janë transferimi i Morgan Rogersit te Chelsea për rreth 136 milionë euro, ai i Elliot Andersonit te Manchester City për rreth 135 milionë euro dhe kalimi i Sandro Tonalit te Tottenhami për rreth 116 milionë euro.
Klubet më të mëdha përpiqen të jenë gjithmonë një hap përpara në treg. Sipas drejtuesve të rekrutimit, lojtarët që mund të transferohen evidentohen herët, studiohen në mënyrë të hollësishme dhe ndiqen për muaj të tërë, me qëllim që vendimet të mos merren nën presion.
Michael Appleton, ish-trajner i Portsmouthit, Blackpoolit dhe Oxfordit, tregon se bisedat mes trajnerëve dhe strukturave të rekrutimit nisin vetëm pak javë pas mbylljes së afatit kalimtar të janarit.
“Sa më shumë afrohet afati kalimtar, aq më të shpeshta bëhen takimet. Fillimisht zhvillohen një herë në javë, më pas çdo disa ditë dhe në fund pothuajse çdo ditë”, ka deklaruar Appleton.
Teknologjia dhe ndërmjetësit kanë marrë një rol qendror në këtë proces. Klubet po përdorin gjithnjë e më shumë platforma digjitale, mes tyre TransferRoom, ku drejtuesit e klubeve dhe agjentët diskutojnë për mundësitë e transferimeve.
Këtë javë, në Madrid do të mblidhen mbi 200 klube dhe 55 agjenci. Aktiviteti synon të krijojë marrëveshje konkrete përpara se afati kalimtar të hyjë në fazën e tij më intensive.
Për klubet e ligave më të ulëta, tregu funksionon ndryshe. Ato shpesh presin fillimisht lëvizjet e skuadrave të mëdha dhe vetëm më pas përpiqen të aktivizohen. Në disa raste, për të gjetur kontakte, u është dashur t’u drejtohen edhe rrjeteve sociale të agjentëve.
Një shembull i veçantë i planifikimit afatgjatë është transferimi i Robert Lewandowskit te Chicago Fire.
Gregg Broughton, drejtori sportiv i klubit amerikan, ka treguar se Lewandowski ishte identifikuar si objektiv që para një dekade. Në atë kohë, klubi besonte se sulmuesi polak mund të bindej një ditë për të kaluar në MLS.
Rasti mori një drejtim konkret në vitin 2025, gjatë bisedimeve për Neymarin, i cili kishte të njëjtin agjent me Lewandowskin. Pas largimit të sulmuesit nga Barcelona, Chicago Fire ndërhyri menjëherë dhe e përfundoi transferimin.
Klubi amerikan nuk u fokusua vetëm te kontrata sportive. Në përgatitjet e marrëveshjes u përfshinë edhe çështje që lidhen me aspektet komerciale, jetën e familjes, shkollimin e fëmijëve dhe projektet e bashkëshortes së lojtarit në Shtetet e Bashkuara.
Pavarësisht planifikimit të gjatë, dita e fundit e afatit kalimtar mbetet e mbushur me të papritura. Klubet e mëdha zakonisht synojnë t’i mbyllin marrëveshjet disa ditë më herët, por jo çdo lëvizje mund të parashikohet.
Drejtuesit sportivë pranojnë se në ditën e fundit shpesh duhet të reagojnë ndaj largimeve të papritura, në vend që të zbatojnë një plan të hartuar më parë.
Agjentët janë bërë pjesë edhe më e rëndësishme e operacionit, pasi përfshihen në të gjitha etapat, nga negociatat deri te dokumentacioni. Kjo ka bërë që procesi i transferimeve të jetë gjithnjë e më kompleks.
“Kur punon në afat kalimtar, asgjë nuk është e çuditshme”, është shprehur një drejtues i rekrutimit në Ligën Premier.
