Sonë, në gjysmëfinalen e Kupës së Botës 2026, do të ndizet sërish një prej rivaliteteve më të flakta të futbollit, ai mes Anglisë dhe Argjentinës. Kanë kaluar plot 21 vjet nga takimi i fundit zyrtar mes këtyre dy përfaqësueseve.
Të lidhura
None found
Takimi i mëparshëm daton në nëntor të vitit 2005 në Gjenevë, ku në një miqësore, kombëtarja angleze e drejtuar nga Sven-Goran Eriksson paraqiti një skuadër të mbushur me emra ikonikë të Ligës Premier.
Porta i ishte besuar Paul Robinson, teksa tresha e mbrojtjes formohej nga Rio Ferdinand, John Terry dhe Ledley King. Krahët mbuloheshin nga Wayne Bridge dhe Luke Young, kurse në mesfushë luanin tre figura si David Beckham, Steven Gerrard dhe Frank Lampard. Dyshja e sulmit përbëhej nga Wayne Rooney dhe Michael Owen.
Argjentina kaloi dy herë në avantazh me realizimet e Hernan Crespo-s dhe Walter Samuel-it, por anglezët gjetën përgjigjen. Fillimisht Rooney rivendosi baraspeshën, dhe më pas Michael Owen shënoi dy gola vendimtarë në minutat e fundit, duke vulosur një fitore dramatike 3-2 për Anglinë.
Një fakt i veçantë është se Lionel Messi, i cili sapo kishte bërë debutimin e tij me Argjentinën në ato kohë, nuk mori pjesë në atë ndeshje. Kjo do të thotë që përballja e sotme gjysmëfinale në Kupën e Botës 2026 shënon herën e parë që Messi përballet me Anglinë në nivel senior./
