Në përfundim të mbledhjes së Këshillit të Ministrave, Delina Ibrahimaj, ministre e Ekonomisë dhe Inovacionit, njoftoi mediat mbi vendimet e marra.
Ajo bëri të ditur se ekzekutivi ka dhënë miratimin paraprak për marrëveshjen e sigurimeve shoqërore me Poloninë, duke e çuar totalin e këtyre marrëveshjeve të ratifikuara në 17.
Të lidhura
None found
“Sot, Ministria e Ekonomisë dhe Inovacionit paraqiti një projektvendim me rëndësi të veçantë. Bëhet fjalë për miratimin në parim të marrëveshjes së sigurimeve shoqërore me Poloninë, e cila rrit në 17 numrin e marrëveshjeve të firmosura,” u shpreh Ibrahimaj.
Ajo theksoi se kjo nismë, e ndjekur prej vitesh dhe e përshpejtuar nga qeveria, është jetike për garantimin e të drejtave të punësimit. Sipas saj, kjo çështje ka qenë një shqetësim i trashëguar ndër vite. Ministrja kujtoi edhe ratifikimin e marrëveshjes me Italinë, një vend ku jeton dhe punon një numër i konsiderueshëm shqiptarësh.
“Po ecim me ritme të larta. Katër marrëveshje të tjera janë aktualisht në tryezën e negociatave dhe besojmë se shumë shpejt do të jenë gati për t’u miratuar në Këshillin e Ministrave dhe për t’u nënshkruar,” shtoi ajo.
Nga ana e tij, ministri i Financave, Petrit Malaj, prezantoi një sërë ndryshimesh ligjore në sistemin financiar, të cilat synojnë përditësimin dhe harmonizimin me direktivat e Bashkimit Europian. Projektligjet e miratuara prekin Ligjin për shërbimet e pagesave, Ligjin për sistemin e pagesave dhe atë për bankat në Republikën e Shqipërisë.
Malaj sqaroi se këto ndërhyrje synojnë jo thjesht modernizimin e sistemit financiar, por edhe sjellin përfitime të drejtpërdrejta për qytetarët dhe sipërmarrjet. Ai përmendi konkretisht uljen e kostove të shërbimeve financiare, forcimin e sigurisë dhe efikasitetit të sistemit, rritjen e mbrojtjes së konsumatorit dhe nxitjen e konkurrencës e inovacionit në treg.
“Kjo paketë ligjore do të kontribuojë në zhvillimin e mëtejshëm të tregut financiar dhe në transformimin e vazhdueshëm të ekonomisë sonë,” përfundoi ministri i Financave.
