Komiteti i Ankesave pranë Federatës Spanjolle të Futbollit (RFEF) nuk e pranoi kërkesën e Real Madridit, duke konfirmuar pezullimin prej katër ndeshjesh për sulmuesin brazilian Vinicius Junior.
Futbollisti u ndëshkua me karton të kuq fundjavën e kaluar, gjatë përballjes që Real Madridi fitoi 1-0 ndaj Villarrealit. Klubi kërkoi anulimin ose reduktimin e masës disiplinore, por organi i apelit vlerësoi se nuk kishte pasur gabim të qartë nga arbitri dhe se dënimi i vendosur fillimisht ishte i argumentuar.
Të lidhura
None found
Real Madridi kundërshtoi si pezullimin me dy ndeshje për përjashtimin, ashtu edhe dy takimet e tjera të shtuara për reagimin e Viniciusit ndaj gjyqtarit Diaz de Mera. Megjithatë, asnjë prej pretendimeve të klubit nuk u mor parasysh.
Për pasojë, Vinicius do të mungojë në sfidën e së dielës ndaj Sevillas në Santiago Bernabeu. Ai nuk do të jetë gjithashtu i disponueshëm për El Clasicon kundër Barcelonës në Camp Nou më 25 tetor, si dhe për ndeshjet e La Ligas ndaj Racing Santander më 1 nëntor dhe Valencias më 7 nëntor.
Braziliani, i cili numëron 57 paraqitje me përfaqësuesen e vendit të tij, pritet të rikthehet në kampionat pas pushimit ndërkombëtar. Ndeshja e tij e radhës mund të jetë përballë Celtës, më 21 ose 22 nëntor.
