Prezantimi i Rodrit nga Barcelona shihet si një thumbim ndaj Real Madridit

Barcelona ka bërë zyrtar kalimin e Rodrit nga Manchester City, në një marrëveshje me vlerë 76.5 milionë euro.

Megjithatë, përveç peshës së transferimit, vëmendje ka tërhequr edhe mënyra e veçantë e prezantimit të mesfushorit spanjoll, e cila është interpretuar si një mesazh i tërthortë për rivalin e përhershëm, Real Madridin.

Videoja e publikuar nga klubi katalanas përqendrohet te aftësia e Rodrit për të diktuar tempin e një ndeshjeje. Në të njëjtën kohë, kjo cilësi vihet përballë shpejtësisë, që konsiderohet një nga armët kryesore të skuadrave kundërshtare.

“Çdo pasim, çdo ndalesë, çdo shpërthim shpejtësie nis me një zgjedhje. Futbolli nuk ka të bëjë vetëm me shpejtësinë – ka të bëjë me ritmin, të dish kur të presësh, kur të lëvizësh dhe se si një prekje mund të ndryshojë gjithçka. Disa lojtarë ndjekin ritmin, të tjerët e vendosin atë”, thuhet në videon e Barcelonës.

Ky formulim është konsideruar si një kunj ndaj Real Madridit, në përbërjen e të cilit bëjnë pjesë disa prej futbollistëve më të shpejtë në botë, mes tyre Vinicius Junior, Kylian Mbappe dhe Yan Diomande.

Para se Barcelona të mbyllte marrëveshjen me Manchester Cityn, Rodri ishte përmendur gjithashtu si një lojtar që mund të transferohej te Real Madridi.

Me afrimin e tij, Barcelona siguron një përforcim të rëndësishëm për repartin e mesfushës dhe realizon një lëvizje të fortë në merkato. Prezantimi i zgjedhur nga klubi, ndërkohë, ka kontribuar në rritjen e mëtejshme të rivalitetit me Real Madridin.