Barcelona përgatit ofertën marramendëse, zbulohet paga e Rodrit

Barcelona është e gatshme të kryejë një investim të jashtëzakonshëm për transferimin e mesfushorit spanjoll Rodri, sipas raportimeve të Diario AS. Ky operacion pritet të jetë një prej lëvizjeve më të bujshme të verës.

Për kartonin e 30-vjeçarit, klubi katalanas parashikon të shpenzojë 60 milionë euro. Rodrit ndërkohë do t’i propozohet një marrëveshje katërvjeçare, me pagë vjetore prej 30 milionë euro bruto, shifër që do ta rendiste mes lojtarëve më të paguar të skuadrës.

I njëjti burim raporton se mesfushori i ka njoftuar drejtuesit e Real Madridit për synimin e tij që të kalojë te Barcelona. Rodri, megjithatë, ka ruajtur respektin e plotë për klubin madrilen dhe ka sqaruar se nuk ndihej mjaftueshëm i bindur për të pranuar një transferim në “Santiago Bernabéu”.

Vendimi i tij është mirëpritur pa tensione nga drejtuesit e Real Madridit në Valdebebas. Qasja e klubit është të rekrutojë vetëm futbollistë që besojnë plotësisht në projektin sportiv.

Në zgjedhjen e Rodrit kanë ndikuar disa elemente të rëndësishme. Ai çmon mënyrën e lojës që Barcelona kërkon të zbatojë, gjurmët që trashëgimia e Pep Guardiolës vazhdon të lërë në filozofinë e klubit dhe raportet shumë të mira me disa bashkëlojtarë të Kombëtares së Spanjës, të cilët tashmë luajnë për ekipin katalanas.

Trajneri Jose Mourinho, nga ana tjetër, është informuar në vazhdimësi për ecurinë e këtij operacioni. Sipas raportimeve, ai mbetet i bindur se Real Madridi disponon alternativa të mjaftueshme në skuadër për të kompensuar mosrealizimin e një transferimi të tillë.

Nëse akordi mbyllet me këto kushte, Barcelona do të marrë një prej mesfushorëve më të mirë të botës dhe njëkohësisht do të përfshihet në një nga operacionet financiare më të shtrenjta të afatit kalimtar veror.