Lojtari më i mirë në botë” – legjenda e Real Madridit vlerëson ndikimin e Rodrit

Rodri, mesfushori i Manchester Cityt, ndodhet pranë kalimit zyrtar te Barcelona gjatë afatit kalimtar të kësaj vere.

Fillimisht, Real Madridi kishte hapur bisedimet për transferimin e tij dhe lojtari ishte pajtuar t’i bashkohej klubit madrilen. Megjithatë, situata ndryshoi papritur pasi Barcelona u përfshi në garë.

Kalimi i mundshëm i kapitenit të Spanjës ka shkaktuar reagime të shumta dhe pritet ta ndezë edhe më shumë rivalitetin mes dy klubeve të mëdha spanjolle gjatë këtij sezoni.

Jorge Valdano, ish-ylli dhe legjenda e Real Madridit, beson se ardhja e Rodrit do të ketë një ndikim të kufizuar në mënyrën se si luan Barcelona.

“Për Barcelonën, transferimi i Rodrit përfaqëson një vendim strategjik. Ai do t’i japë një dimension të veçantë çdo ideje që propozon Flick, por nëse do të shkonte te Real Madridi, do ta ndryshonte rrënjësisht stilin e lojës dhe do ta përmirësonte të gjithë ekipin”.

“Sipas meje, kontributi që Rodri do t’i sjellë Barcelonës vlen 35 milionë euro, ndërsa dëmi që largimi i tij drejt Real Madridit do t’i shkaktonte Barcelonës do të kapte vlerën e 40 milionë eurove”.

Ish-futbollisti argjentinas e shprehu qartë mendimin e tij: transferimi i Rodrit në Barcelonë do ta godiste Real Madridin më shumë gjatë sezonit, sesa do ta forconte skuadrën katalanase.

“Sulmuesit do ta merrnin topin më shpejt dhe në kushte më të mira”.

“Ndikimi i lojtarëve që kontrollojnë topin nuk matet gjithmonë përmes numrit të golave, por kryesisht përmes mënyrës së lojës. Rodri është lojtari më i mirë në botë pikërisht për këtë arsye”, përfundoi ai.