Kombëtarja e Bosnjës dhe Hercegovinës zbret sonte në fushë për ndeshjen e raundit të dytë të fazës së grupeve në Kupën e Botës 2026, ku përballë do të ketë Zvicrën në një prej stadiumeve më imponuese të këtij edicioni.
Kjo ndeshje luhet në ‘SoFi Stadium’, arenë e vendosur në Inglewood, afër Los Angelesit.
Të lidhura
None found
Gjatë Botërorit 2026, impianti po përdoret me emrin “Los Angeles Stadium” dhe bën pjesë te stadiumet që do të presin numrin më të madh të takimeve, me tetë ndeshje të planifikuara në qershor dhe korrik.
Bosnja dhe Hercegovina e hapi turneun me barazim përballë Kanadasë dhe ka një pikë, po aq sa Zvicra, që edhe ajo ndau pikët me Katarin në ndeshjen e parë.
Pikërisht për këtë, sfida e sotme shihet si vendimtare në luftën për kualifikim.
Në përdorimin e tij të zakonshëm, stadiumi është shtëpia e dy skuadrave të NFL-së, Los Angeles Rams dhe Los Angeles Chargers, por njëkohësisht shërben edhe për koncerte e ngjarje të mëdha sportive.
Edhe pse identifikohet gjerësisht si stadium i Los Angelesit, administrativisht ai gjendet në qytetin e Inglewoodit.
Për nevojat e organizimit të Botërorit, stadiumi kaloi disa përshtatje të rëndësishme, ku ndryshimi më i dukshëm ishte heqja e terrenit artificial dhe vendosja e barit natyral, sipas kërkesave të FIFA-s.
Si rezultat i këtij procesi, niveli i sipërfaqes së lojës është ngritur ndjeshëm në krahasim me konfigurimin e zakonshëm të arenës.
Kapaciteti i stadiumit i kalon 70 mijë ulëset dhe pritet që Bosnja dhe Hercegovina të ketë përkrahje të madhe nga tifozët në tribuna.
‘SoFi Stadium’ konsiderohet një nga arenat më prestigjioze në botë. Në vitin 2022 ai priti finalen e Super Bowl LVI, ndërsa në vitin 2023 u shndërrua në skenën e eventit madhor të WWE-së, WrestleMania.
Ky stadium do të jetë mikpritës edhe i Super Bowl LXI në vitin 2027.
Roli i këtij kompleksi do të marrë edhe më shumë peshë në vitin 2028, kur do të jetë vendi ku mbahet ceremonia hapëse e Lojërave Olimpike Los Angeles 2028, si dhe do të transformohet në qendrën më të madhe olimpike të notit në historinë e Lojërave.
Ndërtimi i stadiumit nisi në vitin 2016 dhe përfundoi në vitin 2020, me një kosto prej rreth 6 miliardë dollarësh, çka e bën atë stadiumin më të shtrenjtë të ndërtuar ndonjëherë në botë.
