Pak ditë përpara El Clasicos, kanali zyrtar televiziv i Real Madridit, RMTV, ka drejtuar kritika të forta ndaj Barcelonës dhe mënyrës së gjykimit në La Liga.
Qëndrimi i televizionit madrilen vjen pas një jave të mbushur me vendime të debatueshme arbitrale, të cilat kanë ndikuar në favor të të dyja skuadrave, Real Madridit dhe Barcelonës.
Të lidhura
None found
Një prej rasteve të analizuara ishte fitorja 5-2 e Barcelonës ndaj Real Betisit. RMTV u ndal te episodi i minutës së 45-të, kur goli i Giovanni Lo Celsos u anulua dhe Betisi nuk arriti të barazonte shifrat në 2-2. Sipas versionit të kanalit spanjoll, gjyqtari De Burgos Bengoetxea vendosi për anulimin e golit për prekje me dorë vetëm pasi lojtarët e Barcelonës kërkuan ndërhyrjen e tij.
RMTV e ashpërsoi më tej reagimin, duke pretenduar se futbollistët e Barcelonës kanë ndikim në vendimet e arbitrave dhe në momentet kur aktivizohet VAR-i.
“Në El Clásico, Real Madridi do të ketë përballë 17 gjyqtarë: tre në fushë, një të katërt, një në VAR dhe një asistent, përveç 11 lojtarëve të Barcelonës, të cilët po sillen gjithashtu si gjyqtarë. Tashmë janë ata që përcaktojnë se cilat raste duhet të shqyrtohen nga VAR-i dhe cilat jo. Ata po gjykojnë ndeshjet. Kjo është skandaloze”, thuhet në deklaratën e RMTV-së.
Kanali i Real Madridit deklaroi gjithashtu se ndeshja e së dielës do të jetë një sfidë veçanërisht e vështirë për skuadrën madrilene, duke iu referuar problemeve të gjykimit që, sipas tij, janë të njohura gjerësisht.
RMTV del në mbrojtje të Arda Gulerit për episodin ndaj Sevillas
Një tjetër moment i diskutueshëm i trajtuar nga RMTV ishte dueli mes Arda Gulerit dhe Peque Fernandez në ndeshjen kundër Sevillas.
Disa media në Spanjë kanë argumentuar se mesfushori turk duhej të ndëshkohej me karton të kuq, pasi goditi me bërryl në gjoks kundërshtarin. Megjithatë, televizioni madrilen nuk është pajtuar me këtë vlerësim.
“Përballë të gjithëve dhe gjithçkaje. Kundër sistemit dhe narrativës së mediave, ku vëmendja përqendrohet vetëm te episodi mes Gulerit dhe Peques, ndërsa lihet pas dore fakti se Guleri u tërhoq dhe u pengua në mënyrë të përsëritur”, deklaroi RMTV.
Televizioni i Real Madridit pretendoi se publikut nuk i shfaqen gjithmonë të gjitha pamjet e rëndësishme, duke rikthyer edhe shqetësimet që, sipas tij, i ka ngritur prej vitesh për mënyrën e raportimit të situatave të diskutueshme në ndeshje.
Polemikat e fundit kanë rritur tensionin përpara El Clásico-s, një përballje madhore e futbollit spanjoll, ku Real Madridi dhe Barcelona do të kërkojnë pikët, ndërsa çdo vendim arbitrimi do të ndiqet me vëmendje të veçantë nga opinioni publik.
