Interi është kampioni më i ri i Serie A, duke fituar titullin e 20-të pesë javë para përfundimit të kampionatit.
“Nerazzurët” mposhtën Milanin 1:2 dhe tani kanë 86 pikë, 17 më shumë se ndjekësi i tyre më i afërt që është Milan.
Meritë në këtë sukses të ekipit të Simone Inzaghit, ka edhe mesfushori shqiptar, Kristjan Asllani, i cili po kalon vitin e tij të dytë me fanellën zikaltër.
Asllani është i pari shqiptar që e shijon këtë sukses me “zikaltërit”, derisa i katërti që e ka fituar deri më tani “Scudetton”.
Siç shkruajnë mediat shqiptare, i pari është futbollisti tani i ndjerë Naim Kryeziu, nga Gjakova.
Kryeziu kishte luajtur për tetë vite me Romën, ndërsa kishte fituar titullin e parë në histori të skuadrës italiane në sezonin 1941/42.
Lojtari i dytë me prejardhje shqiptare që ka fituar titullin në Serie A, është sulmuesi Giacomo Vrioni, aktualisht në MLS te New England Revolution.
Ai ishte pjesë e Juventusit në sezonin 19/20 ku luajti një ndeshje dhe u shpall kampion i Italisë.
Ndërkohë futbollisti i tretë shqiptar që ka fituar titullin është Amir Rrahmani me Napolin.
30-vjeçari nga Prishtina u shpall kampion i Italisë me Napolin në sezonin 22/23 ku ishte ndër futbollistët kryesorë të kësaj skuadre.
