Elbasani ka lënë pas startin e vështirë në rezultate dhe ka siguruar fitoren e parë të këtij edicioni. Verdheblutë mposhtën 2 – 1 kampionët e Egnatias në javën e 4-t të Abissnet Superiore.
Të lidhura
None found
Pas përfundimit të takimit, trajneri Ivan Gvozdenovic u shpreh i kënaqur me paraqitjen e skuadrës dhe besimin e rikthyer pas këtij triumfi.
“E gjeta ilaçin për Elbasanin dhe bashkë me të edhe një besim të madh. Na duhej kjo fitore, ndaj tani mund të flasim disi më tepër. Kjo ishte një javë tepër e vështirë për ne, veçanërisht pas humbjes ndaj Dinamos.
E kisha thënë edhe më parë se ekipi do të përgjigjej në fushë dhe sot e bëri këtë. Krijuam një ekuilibër të mirë, ndërsa me pak më shumë saktësi mund të kishim shënuar edhe një gol tjetër. Kam shumë respekt për Egnatian.
Ndryshimet e bëra prej tyre na krijuan vështirësi, por për ne kjo është një fitore e madhe. Do të kemi një javë më të qetë, megjithëse ndeshja e radhës po afron. Në momentin e golit të pësuar duhej të ishim më të kujdesshëm, pasi u shfaqëm disi të çorientuar. Gjithsesi, goli i rivalit erdhi edhe falë aftësive të tij.
Në pjesën e parë, me Mazarin, Nikajn dhe Tresën, ishim shumë energjikë dhe kjo mënyrë funksionoi. Për ne është një ditë e veçantë. Sot jam shumë i kënaqur, ndërsa më pas do të përqendrohemi te java e ardhshme.
Në mesfushë kishim shumë besim. Edhe sezonin e kaluar ishim në nivel të mirë, por tani objektivi ynë është tjetër. Sidoqoftë, sot fituam dhe jemi më të qetë. Kemi ende shumë punë përpara”.
