Përzgjedhësi i Kosovës, Franco Foda, pret një ndeshje të fortë kundër Izraelit, ndonëse kundërshtari ka humbur të dyja takimet e para në këtë edicion të Ligës së Kombeve.
Të lidhura
None found
Izraeli dhe Kosova do të luajnë të enjten nga ora 20:45 në Debrecen të Hungarisë, në xhiron e tretë të Ligës B. Dardanët kanë grumbulluar tri pikë në dy ndeshje, pas fitores 1-0 ndaj Irlandës dhe humbjes 3-1 nga Austria. Ata synojnë fitoren e dytë në këtë kampanjë. Izraeli nuk ka marrë ende pikë, pasi është mposhtur nga Austria dhe Irlanda.
Në konferencën për media, Foda tha se rezultatet e deritanishme nuk e pasqyrojnë plotësisht forcën e Izraelit dhe kërkoi përqendrim maksimal nga lojtarët e tij. Sipas tij, kundërshtari ka futbollistë me teknikë e shpejtësi, të cilët janë të fortë edhe në aspektin individual.
Trajneri bëri të ditur se Kosova do të përpiqet të luajë me sa më shumë agresivitet në këtë përballje.
Para ndeshjes me Izraelin, Ilir Krasniqi ka thënë se skuadra duhet të përmirësohet dhe të mësojë nga takimi i kaluar.
