Barcelona po vijon me përpjekjet për të siguruar shërbimet e sulmuesit argjentinas Julian Alvarez, teksa Atletico Madridi ka përcaktuar tashmë kushtet që do të pranonte për këtë marrëveshje.
Të lidhura
None found
Në një deklaratë të fundit, presidenti i klubit katalunas, Joan Laporta, pranoi se tashmë ka nisur sulmi për lojtarin 26-vjeçar dhe theksoi se shifra financiare e propozuar është mjaft e majme.
Ai zbuloi se bisedimet me drejtuesin e Atleticos, Miguel Angel Gil Marin, kishin qenë të sinqerta dhe pa ekuivoke, duke paralajmëruar se megjithëse oferta është voluminoze, ajo nuk është pa limit.
Burime pranë çështjes tregojnë se oferta e parë e Barcelonës përbëhet vetëm nga komponenti financiar dhe sillet midis 100 dhe 120 milionë eurosh. Sidoqoftë, në rast nevoje, katalanasit mbeten të hapur për të shtuar një lojtar në paketën e transferimit.
Sipas gazetës Mundo Deportivo, Atletico Madridi synon të fusë në lojë për këto negociata talentin e ri, Marc Bernal, i cili është vetëm 19 vjeç. Për trajnerin Diego Simeone, mesfushori përfaqëson një vlerë të madhe dhe shihet si shtylla e ardhshme e mesfushës së skuadrës.
Por te Barcelona, qëndrimi është krejtësisht tjetër. Ata nuk kanë as më të voglin qëllim të heqin dorë nga Bernal. Lojtari gëzon mbështetje absolute nga ana e trajnerit Hansi Flick, ndërkaq vetë talenti është i përqendruar tërësisht te projekti i tij në “Camp Nou”.
Rrjedhimisht, pritet që klubi katalunas ta kthejë mbrapsht kërkesën e Atleticos, duke bërë që bisedimet për të ardhmen e Julian Alvarez të jenë të pritshme edhe në ditët në vijim.
