Para ndeshjes së së shtunës ndaj Panamasë në fazën e grupeve të Kupës së Botës, Anglia mund të ketë një mungesë të rëndësishme, pasi mbrojtësi i djathtë Reece James është në dyshim. Kapiteni i Chelseat po vëzhgohet nga afër nga stafi mjekësor, pasi ka shfaqur shqetësime për një tërheqje muskulore në kofshën e pasme, ndërsa trajneri Thomas Tuchel po mendon alternativa në repartin defensiv.
Pas sfidës së të martës kundër Ganës, mbrojtësi nuk është ndier mirë dhe për këtë arsye po i nënshtrohet një sërë kontrollesh mjekësore.
Të lidhura
None found
Sipas The Telegraph, stafi teknik nuk dëshiron të rrezikojë, duke marrë parasysh problemet që 26-vjeçari ka pasur më herët me dëmtimet muskulore.
Vështirësitë shtohen edhe më shumë sepse kombëtarja angleze tashmë nuk e ka në dispozicion Tino Livramenton, alternativën e dytë për krahun e djathtë të mbrojtjes, i cili u la jashtë turneut përpara ndeshjes hapëse si pasojë e një dëmtimi në pulpë.
Si skuadra që kryeson Grupin L, Anglia e pret një përballje me ngarkesë fizike ndaj një Panamaje të organizuar mirë në mbrojtje, e cila deri tani ka pësuar vetëm dy gola në këtë turne.
Megjithatë, trajneri gjerman nuk parashikohet të bëjë lëvizje të mëdha për këtë takim përballë Panamasë, skuadër që Anglia e kishte mposhtur 6-1 në Kupën e Botës 2018 në Rusi, por që në këtë turne ka regjistruar dy humbje minimale 1-0.
Nico O’Reilly i Manchester City mund të aktivizohet nga minuta e parë në krahun e majtë të mbrojtjes në vend të Djed Spence, por Tuchel ka mbështetur balancën e ekipit të tij dhe ka nënvizuar se vazhdimësia është thelbësore, pavarësisht kritikave për paraqitjen sulmuese ndaj Ganës.
Nëse James mungon nga formacioni titullar, Ezri Konsa mund të spostohet nga qendra e mbrojtjes në krah, ndërsa në mesfushë Kobbie Mainoo mbetet opsion zëvendësues në rast se Declan Rice nuk është në gjendjen më të mirë fizike.
Për ekipin anglez, ruajtja e vazhdimësisë taktike konsiderohet vendimtare në përpjekjen për të marrë pikët e plota dhe për të vulosur vendin e parë në grup.
