Para pak ditësh, producentja e “Big Brother Albania VIP”, Lori Hoxha, zbuloi në një intervistë ekskluzive për Top Albania Radio disa detaje nga edicioni i parë që do të nisë me 5 tetor.
E pyetur rreth opinionistëve, Lori ka konfirmuar se do të ketë dy të tillë në “Big Brother VIP” dhe madje që nuk i kemi parë më parë në këtë profil. Dhe jo, nuk është Arjan Konomi që është përfolur në rrjetet sociale.
Mirëpo, tani që përgatitjet janë drejt fundit, ka edhe më shumë punë për të kuruar çdo detaj, dhe Lori shihet absolutisht çdo ditë në ambientet e “Top Channel”, nga ku ndan shumë shpesh foto e video. Dhe ajo ka zbuluar përmes një Instastory se e ka një “opinioniste ëndrrash”, që është motra e saj Sara, me të cilën Lori është shumë e lidhur.
Më parë, Lori publikoi edhe një video funny, ku e pyeste motrën për banorët, e ajo me humor jepte mendimin e saj. Dhe në fakt, do të ishte interesante ta shihnim vërtet Sarën në vendin e opinionistes së shtëpisë më të famshme në Shqipëri.
Ndërkohë, “Big Brother VIP”, nis të martën, dhe kurioziteti i publikut është i madh, sidomos pas pauzës së këtij formati.
