Hysni Zela, artisti i njohur i këngës popullore dhe vëllai i divës shqiptare Vaçe Zela, ishte i ftuar sot në emisionin “S’e Luan Topi”, ku ndau kujtime të rralla dhe emocionuese nga jeta e tij.
Rrëfimi i tij u kthye fillimisht te fëmijëria në Lushnje, të cilën e përshkroi si shumë të varfër, por të ngjashme me realitetin e familjeve të tjera të asaj periudhe. Në atë kohë, Vaçja, si motra më e madhe, ndiqte gjimnazin në Tiranë dhe këmbëngulte që edhe pjesa tjetër e familjes të vendosej në kryeqytet, ndonëse prindërit nuk ishin dakord.
Të lidhura
None found
Artisti kujtoi se ishte 14 vjeç kur mbërriti në Tiranë. Kur nisi të këndonte përkrah Vaçes, ajo tregohej veçanërisht kërkuese dhe e korrigjonte vazhdimisht, me synimin që ai të përmirësonte interpretimin.
Sipas Hysni Zelës, motra e tij, e cila pati sukses gjatë gjithë jetës, i kushtonte rëndësi edhe shprehjes së fytyrës gjatë këndimit. Ajo e pyeste: “Pse e bën fytyrën kështu?”, ndërsa ai i përgjigjej: “Si ta bëj mor aman”. Pas vërejtjeve të saj, ai i kishte thënë me sinqeritet dhe humor: “E di që të kom frikë unë kur flet ti kështu?”.
Megjithëse ndër vite ka ndërtuar profilin dhe identitetin e vet artistik, Hysni Zela pranoi se vazhdon të njihet shpesh nëpërmjet emrit të motrës së famshme. Ai tha se ndihet krenar për këtë lidhje, por nuk e fshehu humorin për faktin që emri i tij mbetet shpesh në plan të dytë.
“Unë po shkoj 80-vjeç dhe ende më thonë ‘vëllai i Vaçe Zelës’”, u shpreh ai, duke shtuar se këtë e konsideron krenari, por njëkohësisht pyet me shaka: “Si nuk thanë njëherë Hysni Zela?”.
Duke folur për Vaçen jo vetëm si artiste, por edhe si motër dhe njeri, ai e cilësoi të jashtëzakonshme dhe theksoi përkushtimin e saj të madh ndaj familjes. Hysni Zela kujtoi se ajo i ndihmonte prindërit dhe u bë shkak që familja të zhvendosej në mes të Tiranës në atë periudhë.
Ai tregoi gjithashtu se Vaçja kujdesej vetë për nevojat e përditshme të familjes: dilte për të bërë pazarin dhe merrte përsipër gjithçka që duhej kryer.
