Edicioni i 25-të i Festivalit “Teatri Shqiptar në Maqedoni”, Dibër, u mbyll të martën në Qendrën për Kulturë të qytetit. Programi i natës përmbyllëse nisi me monodramën “Psikoza”, e bazuar në motive të Sarah Kane dhe me regji të Besfort Idrizit, ndërsa në vijim u zhvillua ceremonia e ndarjes së çmimeve.
Të lidhura
None found
Juria, e përbërë nga Hismet Ramadani, Lesh Nikolla dhe Faik Gashi nga Prishtina, shpalli fituesit përpara publikut dibran, i cili edhe këtë mbrëmje mbushi sallën e Qendrës për Kulturë.
Çmimi kryesor për shfaqjen më të mirë shkoi për Teatrin Shqiptar në Shkup, për produksionin “Zotëria i Parë”. Visar Etemi u vlerësua si aktori më i mirë protagonist, ndërsa çmimi për aktoren më të mirë protagoniste iu dha dibranes Yllka Nuredini.
Çmimi i skenografisë iu akordua Teatrit të Kumanovës nga juria profesionale e festivalit.
Drejtori i festivalit, Ylber Nuredini, e cilësoi edicionin e 25-të si shumë të suksesshëm dhe vlerësoi nivelin e lartë profesional të teatrove pjesëmarrëse. Ai shprehu mirënjohjen për Ministrinë e Kulturës dhe Turizmit, Komunën e Dibrës dhe Kompaninë Slice, si mbështetës të aktivitetit.
Në emër të Komunës së Dibrës, sekretari Lumi Croj përshëndeti festivalin dhe deklaroi se pushteti vendor do të vijojë ta mbështesë Festivalin e Teatrit Shqiptar në Maqedoni. /V.S/
