Zëvendësministri i Arsimit, Driton Sulejmani, deklaroi se ulja e numrit të nxënësve në shkollat fillore dhe të mesme po trajtohet përmes optimizimit të paraleleve dhe institucioneve arsimore.
Të lidhura
None found
Në një prononcim për Alsat, Sulejmani tha se kjo nismë synon të krijojë kushte më të favorshme për nxënësit dhe të përmirësojë procesin edukativo-arsimor.
Sipas tij, rënia e numrit të nxënësve lidhet me emigrimin e vazhdueshëm ndër vite, një problem i trashëguar me të cilin po përballet vendi. Për këtë arsye, Ministria e Arsimit dhe Shkencës po bashkon paralelet e shkollave fillore dhe të mesme, veçanërisht në zonat rurale. Sulejmani solli si shembull raste kur një godinë shkollore ka vetëm dy nxënës, ndërsa një shkollë pranë saj ka po ashtu vetëm dy nxënës; në këto kushte, dy shkollat bashkohen në një të vetme. Ai theksoi se prania e një numri më të madh nxënësish në klasë nxit konkurrencën dhe ndihmon socializimin mes fëmijëve. /alsat
