Drejtori i Fondit të Sigurimeve Shëndetësore, Zllatko Perinski, deklaroi se rastet e keqpërdorimit të lejeve mjekësore po evidentohen jo vetëm në institucionet publike, por edhe në kompanitë private.
Të lidhura
None found
Gjatë konferencës së sotme për mediat, Perinski bëri të ditur se pagesat për lejet mjekësore dhe përfitimet e lehonisë do të kryhen më rregullisht. Në të njëjtën kohë, ai paralajmëroi vendosjen e kritereve më të qarta për miratimin e lejeve mjekësore dhe shtimin e kontrolleve, përfshirë vizitat e kontrollorëve te personat e siguruar që ndodhen në shtëpi me pushim mjekësor.
“Nga mostra e shqyrtuar nga Ministria e Punëve të Brendshme, rreth 30 përqind e rasteve rezultuan me abuzime dhe, për këtë arsye, Fondi vendosi gjoba. Verifikimet për lejet mjekësore të raportuara nga Ministria e Mbrojtjes janë në përfundim dhe shumë shpejt do t’ju njoftojmë. Megjithatë, problematika nuk lidhet vetëm me punonjësit e sektorit publik, pasi së fundmi kemi marrë raportime edhe nga sektori privat dhe nga punëdhënësit”, tha Perinski për “Lokalno”.
Sipas tij, pushimi mjekësor mbetet një çështje delikate. Ai theksoi se synimi nuk është t’u mohohen të drejtat personave të siguruar, por të parandalohet përdorimi abuziv i tyre.
“Për vitin 2026, FSSH-ja ka planifikuar në buxhet 6 miliardë e 454 milionë denarë për pushimet mjekësore dhe të lehonisë. Bëhet fjalë për një shumë të konsiderueshme, ndaj duhet ta forcojmë mekanizmin e kontrollit”, u shpreh Perinski.
