Mickoski publikon emrat e ministrave të rinj, votimi për përbërjen e re të Qeverisë pritet deri në mesin e korrikut

Pas mbledhjes së djeshme të Komitetit Ekzekutiv të OBRM-PDUKM-së, kryeministri dhe njëherazi kreu i partisë, Hristijan Mickoski, bëri të ditur përbërjen e propozuar të kabinetit të tij të ri. Ai prezantoi edhe ndarjen e portofoleve të dakorduara me partnerët e koalicionit “VLEN” dhe ZNAM. Sipas paralajmërimeve, propozimi për përbërjen e re qeveritare duhet t’i dorëzohet Kuvendit deri të premten, ndërsa zgjedhja e saj pritet të përfundojë jo më vonë se mesi i korrikut.

Mickoski deklaroi se ky rikonstruim qeveritar përfaqëson hyrjen në një etapë të re, pas dy viteve të punës së ekzekutivit, periudhë që, sipas tij, ka qenë e mbushur me sfida të mëdha, me vendosje themelesh, stabilizim të gjendjes dhe realizim të projekteve të mëdha. Ai theksoi se periudha që pason do të ketë edhe më shumë theks te efikasiteti, dinamika dhe prodhimi i rezultateve për qytetarët, duke e përshkruar atë si energji të re për një përshpejtim të ri.

Sipas kryeministrit, çdo funksionar duhet të jetë i qasshëm, i përgjegjshëm dhe plotësisht i përkushtuar ndaj detyrës së tij.

Në ndryshimet e paralajmëruara, Sasho Klekovski, ish-drejtori i Fondit të Sigurimeve Shëndetësore, propozohet si ministër i ri i Shëndetësisë. Vendin e tij do ta marrë Zlatko Perinski, i cili aktualisht ushtron detyrën e Ministrit të Vetëqeverisjes Lokale. Për postin e ministrit të Politikës Sociale, Demografisë dhe Rinisë është propozuar Gjoko Velkovski, që më herët ka qenë zëvendësministër në të njëjtën ministri. Këto dy portofole të reja, në të ardhmen, do të udhëhiqen nga kuadro të OBRM-PDUKM-së.

Ivan Stoiljkoviq do të jetë ministër i ri i Vetëqeverisjes Lokale. Ndërkohë, funksionin e ministrit pa portofol, përgjegjës për integrimin dhe zbatimin e Strategjisë për Përfshirjen e Romëve, do ta mbajë Erxhan Demir, ekonomist i diplomuar, i cili deri tani ka qenë kryetar i Komitetit Qendror të OBRM-PDUKM-së në komunën e Shuto Orizarës.

Po ashtu, në përbërjen e re nuk do të ketë Zëvendëskryeministër për Qeverisje të Mirë, pasi ky departament do të kalojë nën kompetencën e Zyrës së Kryeministrit.

Mickoski sqaroi se departamenti aktual për qeverisje të mirë, përkatësisht posti i Zëvendëskryeministrit në Qeveri për Qeverisje të Mirë, po shfuqizohet. Sipas tij, kjo fushë do të kalojë drejtpërdrejt nën autoritetin e Zyrës së Kryeministrit. Ai bëri të ditur se, krahas sekretarit ekzistues që ndjek punën e Qeverisë dhe zbatimin e programit, tani do të ketë edhe një sekretar nga kabineti i cili do të jetë përgjegjës për qeverisje të mirë.

Shumica parlamentare qeveritare do të zgjerohet edhe me një deputet nga Partia Demokratike e Turqve, e cila, sipas marrëveshjes së arritur, do t’i bashkohet koalicionit të udhëhequr nga OBRM-PDUKM. Kjo parti do të përfaqësohet me një ministër pa portofol.

Nga ana tjetër, “VLEN” do të marrë drejtimin e Ministrive të Drejtësisë, Kulturës dhe Turizmit, si dhe të Marrëdhënieve mes Komuniteteve. Ky koalicion do të vazhdojë gjithashtu të udhëheqë sektorët e Mjedisit, Çështjeve Evropiane dhe Ekonomisë dhe Punës.

ZNAM bëri të ditur se merr Ministrinë e Bujqësisë, Pylltarisë dhe Administrimit të Ujërave. Kandidatura e tyre për ministër është Borçe Serafimovski, i cili aktualisht mban postin e Sekretarit të Shtetit në këtë ministri. Ndërkohë, Goran Minçev mbetet në krye të Ministrisë së Administratës Publike.