Sipas analizës së “Al Jazeera Balkans”, Maqedonia e Veriut renditet e para ndër vendet e rajonit të përfshira në studim për moshën e flotës së automjeteve, e cila mesatarisht është 19,4 vjet.
Gjatë periudhës nga viti 2012 deri në vitin 2024, numri i automjeteve të regjistruara pothuajse u dyfishua, ndërsa mosha mesatare e tyre ndryshoi fare pak.
Të lidhura
None found
Në vitin 2012 numëroheshin afërsisht 350 mijë automjete, kurse më 2024 shifra arriti në rreth 700 mijë. Kjo përkthehet në afërsisht 383 automjete të regjistruara për çdo 1.000 banorë.
Plot 87,9 për qind e automjeteve janë mbi shtatë vjeç. Mosha e tyre mesatare tejkalon ndjeshëm atë të Bashkimit Evropian, ku kjo shifër është 12,7 vjet.
Në vendet e tjera të rajonit, automjetet janë mesatarisht 18 vjet në Kosovë, 17,3 vjet në Greqi dhe 17,06 vjet në Mal të Zi. Kroacia ka një mesatare prej 14,63 vjetësh, ndërsa Sllovenia prej 11,2 vjetësh.
Importimi në shkallë të gjerë i veturave të përdorura nga Evropa Perëndimore, sidomos nga Gjermania dhe Italia, shihet si një prej shkaqeve kryesore. Fuqia e kufizuar blerëse ua vështirëson shumë qytetarëve të Ballkanit blerjen e automjeteve të reja.
Disa shtete të rajonit kanë kufizuar importin e automjeteve të vjetra, veçanërisht atyre me naftë. Në Bosnjë e Hercegovinë dhe Mal të Zi janë ndaluar disa kategori të këtyre automjeteve, kurse Serbia ende lejon importimin e veturave më të vjetra se 20 vjet.
