LSDM vlerëson se Hristijan Mickoski ka nisur të besojë vetë gënjeshtrat e tij. Sipas kësaj partie, ai deklaroi dje se opozita po e bllokon Kodin Zgjedhor ngaqë, siç u shpreh, “ka frikë nga sukseset e Qeverisë”.
Të lidhura
None found
“Ne do të përgjigjemi me fakte dhe jo me propagandë. Së pari, në raportin e qershorit 2026, Parlamenti Europian nuk e pozicionon Maqedoninë mes vendeve më të mira të rajonit. Përkundrazi, aty shprehet keqardhje për mungesën e përparimit që nga raporti paraprak, sidomos në sundimin e ligjit, reformat në gjyqësor dhe luftën kundër korrupsionit. Ndërkohë që Mali i Zi synon anëtarësimin në vitin 2028 dhe Shqipëria po shkon drejt përmbylljes së negociatave në vitin 2027, Maqedonia ndodhet në stagnim”.
“Së dyti, të ashtuquajturat ‘suksese’ të Qeverisë shihen çdo ditë: ekonomia është në kolaps dhe investimet kanë rënë me 60%; buxheti është pa para dhe vetëm për dy vjet shteti është zhytur në borxh me 2.5 miliardë euro, ndërsa së shpejti nuk do të ketë pagesa të rregullta të pensioneve; qytetarët presin me orë të tëra në kufi për shkak të politikës së izolimit; të rinjtë po ikin masivisht sepse mungon perspektiva evropiane”.
“Së treti, Mickoski pretendon se Qeveria i ka pranuar të gjitha propozimet e opozitës. Kjo nuk është e saktë. Nuk e dimë se kujt i referohet, sepse LSDM dhe njerëzit rreth Frontit të së Vërtetës dhe Drejtësisë janë opozita e vetme reale në Maqedoni. Çdo gjë tjetër është teatër. Mickoski e ka kthyer Maqedoninë në një shtojcë në Ballkan”.
“Së katërti, opozita nuk e bllokon Kodin Zgjedhor nga frika ndaj ‘sukseseve’, sepse të tilla nuk ekzistojnë. Suksesi i vetëm i kësaj Qeverie, sipas tyre, shihet vetëm në planin personal – te tenderët kriminalë”, thonë nga LSDM.
