Janevska mbron kushtet në konviktin “Stiv Naumov”: Kompania realizuese po mënjanon mangësitë

Konvikti i rinovuar “Stiv Naumov” në Shkup është bërë shkak për përplasje mes pushtetit dhe opozitës. Të rinjtë socialdemokratë pretendojnë se studentët përballen me kushte të papërshtatshme, ndërsa ministrja e Arsimit dhe Shkencës, Vesna Janevska, i kundërshton akuzat dhe i fton përfaqësuesit e LSDM-së ta shohin vetë objektin.

Reagimi i saj pasoi konferencën për shtyp të nënkryetarit të Rinisë Socialdemokrate të Maqedonisë, Bojan Cvetanoski. Ai ngriti pikëpyetje për përdorimin e mjeteve të ndara për rinovimin, duke e quajtur të papranueshme që, në një konvikt të saporinovuar, studentët të përballen me lagështi, rrjedhje uji, si dhe probleme me ngrohjen dhe ujin e ngrohtë.

Në një postim në Facebook, Janevska i cilësoi kushtet në “Stiv Naumov” të shkëlqyera. Ajo tha se ky është i pari nga nëntë objektet e akomodimit studentor që, gjatë mandatit të Qeverisë aktuale, do të rinovohen plotësisht dhe do t’u përmirësohet efikasiteti energjetik.

Për mangësitë e raportuara, ministrja u shpreh se probleme të veçuara mund të shfaqen edhe pas rinovimit të një objekti. Sipas saj, konvikti është ende nën garanci dhe kompania realizuese po punon për t’i mënjanuar problemet e evidentuara.

Janevska tha gjithashtu se disa prej problemeve lidhen me përdorimin e papërgjegjshëm të ambienteve nga banorët. Ajo kujtoi se, që kur objekti u vu në funksion, ishte bërë thirrje për përdorim të përgjegjshëm.

Sipas reagimit të saj, drejtuesit e konviktit janë përballur me kanalizim të bllokuar nga pecetat e lagura, me alarmin e aktivizuar nga ushqimi i lënë në një furrë me mikrovalë të ndezur në kuzhinën e përbashkët dhe, në një rast tjetër, nga një cigare e ndezur në dhomë. Ministrja përmendi edhe një radiator të shkulur dhe automjete të parkuara mbi sipërfaqet e gjelbra të oborrit. Ajo tha se të gjitha këto situata janë tejkaluar.

Janevska pohoi, po ashtu, se ushqimi që u shërbehet studentëve në konvikt përmbush standardet e përcaktuara ushqyese.