Hetimi për aferën 167 milionë euro të mazutit rikthehet, në dosje edhe familjarë politikanësh

Prokuroria e Lartë Publike ka rikthyer në shqyrtim aferën “Mazuti”, një hetim kompleks financiar dhe energjetik me vlerë 167 milionë euro. Vendimi për ndalimin e procedurës është anuluar, ndërsa janë kërkuar veprime të tjera hetimore për të sqaruar ligjshmërinë e prokurimeve të mazutit për TEC Negotinën gjatë krizës energjetike, përcjell INA.

Çështja lidhet me 13 persona fizikë dhe një kompani. Në maj të vitit 2026, Prokuroria Themelore Publike për Ndjekjen e Krimit të Organizuar dhe Korrupsionit vendosi ta mbyllte hetimin, duke argumentuar se nuk kishte prova për ndotje ekologjike dhe se SHA “Elektranat e Maqedonisë së Veriut” (EMV) nuk ishte dëmtuar financiarisht, pasi furnizimi gjatë krizës kishte vijuar normalisht.

Pas ankesës së paraqitur nga EMV-ja, Prokuroria e Lartë evidentoi mangësi të rëndësishme në ekspertizat ekonomike të kryera deri tani. Për këtë arsye, ajo urdhëroi kthimin e lëndës për hetime të mëtejshme, me qëllim përcaktimin e përgjegjësive të mundshme individuale dhe institucionale.

Në mesin e personave që po shqyrtohen janë edhe bartësit e vendimeve kryesore për tenderët. Në dosje përfshihen Ratko Kapushevski dhe Erxhan Sulkoski, pronarë të kompanisë “RKM” që fitoi tenderin, Asmir Jahoski, pronar i “Pucko Petrol”, si dhe ish-drejtori i EMV-së, Vasko Kovacevski.

Burime jozyrtare bëjnë të ditur se në këtë aferë mund të jenë të përfshirë edhe familjarë të politikanëve, krahas personave të tjerë publikë.

Ministri i Punëve të Brendshme, Pançe Toshkovski, deklaroi dje se informacionet që ka marrë për këtë rast mund të shkaktojnë tronditje në opinionin publik, pas vendimit për rihapjen e çështjes së mazutit.

“Në pajtueshmëri me atë që është ndarë me mua si informacion nga ana e atyre që kanë punuar intensivisht me atë lëndë. Informacionet që janë ndarë me mua e që lidhen me lëndën, jam i sigurt që do ta tronditin opinionin kur do të shpërndahen. Ja kaq do të them dhe do të lë që hetimi ta tregojë të veten” – deklaroi Toshkovski.

Megjithatë, ministri nuk dha përgjigje nëse personat që aktualisht dyshohen në këtë çështje ndodhen apo jo në territorin e shtetit.

Afera ka nxitur debate dhe ndarje të forta në opinion, ku përballen akuzat politike me argumentet e bazuara në vlerësime ekonomike.

VMRO-DPMNE, partia në pushtet, kishte deklaruar më herët se vendimi fillestar për mbylljen e rastit nga prokurorët Islam Abazi dhe Katerina Kollareviq ishte një “amnisti për krimin e strukturave të afërta me LSDM-në dhe BDI-në”. Në anën tjetër, disa ekspertë ekonomikë dhe analiza mediatike argumentojnë se blerja e mazutit “shpëtoi miliona”, pasi TEC Negotina prodhoi energji më të lirë në një periudhë kur energjia elektrike e importuar në bursë kishte çmime jashtëzakonisht të larta. Përfundimi pritet të përcaktohet nga ekspertizat e reja financiare dhe teknike. (INA)