EMV dhe KEK arrijnë marrëveshje trevjeçare, Maqedonia e Veriut do të furnizohet me qymyr nga Kosova

Elektranat e Maqedonisë së Veriut dhe Korporata Energjetike e Kosovës kanë formalizuar një partneritet strategjik për tre vjet, i cili synon të garantojë furnizim të pandërprerë dhe të qëndrueshëm me qymyr për termocentralet në Maqedoninë e Veriut.

Pas negociatave intensive dhe miratimit të një vendimi nga Qeveria, marrëveshja i mundëson EMV-së të marrë me koncesion minierën e Obiliqit. Gjatë një periudhe prej 36 muajsh parashikohet nxjerrja e rreth 3 milionë tonëve qymyr, me çmim të përcaktuar prej 24.4 eurosh për ton.

Drejtori i përgjithshëm i AD ESM-së, Lazo Uzunçev, bëri të ditur se, ndërsa po zhvillohet konsolidimi i minierave, sasia vjetore e nevojshme e qymyrit të blerë për plotësimin e prodhimit vendor vlerësohet në rreth 1.4 milionë tonë. Megjithatë, ai sqaroi se kufizimet e kapacitetit në pikën kufitare Bllacë bëjnë që nga KEK-u të mund të sigurohen realisht rreth 800 mijë tonë në vit.

Sipas Uzunçevit, qymyri i pellgut të Obiliqit ka një fuqi kalorike mesatare prej afërsisht 1,950 kcal/kg, ndërsa karakterizohet nga nivele të ulëta squfuri dhe hiri. Ai vlerësoi se këta tregues janë të përshtatshëm për kapacitetet prodhuese të termocentraleve në Manastir dhe Osllomej.

EMV pret që përdorimi i qymyrit kosovar të përmirësojë efikasitetin e termocentraleve dhe të mundësojë prodhimin e rreth 800 gigavat-orëve energji elektrike shtesë në vit. Nga kjo sasi parashikohen të ardhura në nivelin e rreth 57 milionë eurove, krahas reduktimit të konsumit të mazutit dhe të emetimeve të CO₂.

Uzunçev deklaroi gjithashtu se bashkëpunimi me kompaninë shtetërore të energjisë në Kosovë përbën një rrugë të shpejtë dhe të sigurt drejt synimit që Maqedonia të shndërrohet në një eksportuese neto dhe të vazhdueshme të energjisë elektrike.

SHA EMV njoftoi se, deri në fund të gushtit, do të hapë tenderin për përzgjedhjen e operatorit ekonomik që do të kryejë nxjerrjen, analizimin, ngarkimin dhe transportimin e qymyrit nga Obiliqi drejt depove të termocentraleve në Manastir dhe Osllomej.

Kompania sqaroi se marrëveshja do të nisë të zbatohet zyrtarisht pasi të përmbyllet procedura për zgjedhjen e operatorit ekonomik.