Gjykimi për tragjedinë në “Pulse”: 49 seanca të zhvilluara, 45 dëshmitarë dhe pesë ekspertë të dëgjuar

Procesi gjyqësor për zjarrin në diskotekën “Pulse” në Koçan ka vijuar pa asnjë shtyrje që prej nisjes së tij. Tragjedia, e ndodhur gjatë një shfaqjeje të grupit DNA, shkaktoi vdekjen e 63 personave dhe plagosjen e më shumë se 200 të tjerëve.

Deri tani janë zhvilluar 49 seanca, 40 prej tyre gjatë këtij viti. Gjykata ka planifikuar edhe 15 seanca të tjera, të cilat pritet të mbahen deri në fund të vitit 2026. Këto të dhëna u bënë publike sot gjatë një informimi në Gjykatën Themelore Penale në Shkup.

Më 14 shtator përfundoi administrimi i provave të paraqitura nga Zyra e Prokurorit Publik. Në këtë fazë u prezantuan 1.390 prova materiale, ndërsa u morën në pyetje 45 dëshmitarë dhe pesë ekspertë.

Prezantimi i provave nga ana e mbrojtjes do të nisë më 1 tetor. Në këtë fazë janë njoftuar 244 dëshmitarë.

Masa e paraburgimit për të pandehurin e parë, Dejan Jovanov-Deko, përfundon ligjërisht më 3 tetor. Mbrojtja ka bërë të ditur se do të ofrojë një garanci pasurore prej gati 200 mijë eurosh, edhe pse një garanci e tillë nuk është e detyrueshme.

Gjykata sqaroi se nuk mund të marrë vendim për këtë çështje pa marrë më parë qëndrimin e Zyrës së Prokurorit Publik. “Deri më sot nuk është kthyer nga Zyra e Prokurorit Publik. Nuk kemi mendim dhe për këtë arsye nuk mund të vendosim. Afati skadon më 3 tetor. Do të presim deri të premten”, u deklarua gjatë informimit në Gjykatën Penale.

Çështja ndodhet aktualisht në fazën e administrimit të provave. Procesi drejtohet nga gjyqtarja Dijana Gruevska-Ilievska, ndërsa akuzën e përfaqëson një ekip prej 15 prokurorësh publikë.

Zjarri në diskotekën “Pulse” në Koçan shpërtheu më 16 mars 2025, gjatë performancës së grupit DNA. Me 63 viktima dhe mbi 200 të plagosur, ngjarja konsiderohet një nga tragjeditë më të rënda të historisë së fundit të Maqedonisë së Veriut.