Venko Filipçe, kryetar i LSDM-së, deklaroi në konferencën e sotme për shtyp se pas dobësimit të Aleksandar Vuçiqit po shembet edhe rrjeti kriminal në Ballkan. Sipas tij, kjo situatë do të sjellë zgjidhje për të gjitha lidhjet kriminale që lidhen me Hristijan Mickoskin.
Filipçe tha se Vuçiqi ka qenë mentor dhe komandant i Mickoskit, ndërsa mënyra e tij e qeverisjes është kopjuar në Maqedoni përmes ndërthurjes së marrëdhënieve politike, biznesore dhe mediatike.
Të lidhura
None found
“OBRM-PDUKM është në thelb një parti më e vogël, një shtojcë e partisë së tyre simotër SNS nga Serbia. Aleksandar Vuçiq ishte mentori dhe komandanti i tij, personi që i dha Hristijan Mickoskit udhëzime për mënyrën se si duhej të vepronte këtu, në vendin tonë. Fatkeqësisht, ai e zbatoi me shumë sukses atë sistem në vendin tonë”, u shpreh Filipçe.
Sipas kreut të LSDM-së, deklaratat e tij për zhvillimet në Serbi kanë të bëjnë me ndryshimet demokratike në rajon dhe me dobësimin e rrjetit kriminal që mban në pushtet Mickoskin. Pas këtij procesi, ai tha se do të vijë edhe momenti i përgjegjësisë.
“A po festojmë zgjedhjet e dikujt tjetër? Jo. Ne po festojmë ardhjen e valës demokratike në rajon. Lidhjet biznesore, politike dhe mediatike të Aleksandar Vuçiqit, si edhe ato të Viktor Orbanit deri pak kohë më parë, janë rrjetet që ushqejnë regjimin e Hristijan Mickoskit këtu. Ato na mbajnë të robëruar, në errësirë mediatike dhe nën një regjim të fuqishëm e të korruptuar. Tashmë, këtij realiteti po i afrohet gradualisht fundi”, deklaroi Filipçe.
Ai përmendi gjithashtu hyrjen e “Alta Banka”-s në vend dhe zgjerimin e mediave serbe, duke i cilësuar si pjesë të së njëjtës skemë ndikimi. Filipçe shtoi se përçarja e opozitës përbën një tjetër element të modelit qeverisës të marrë nga Vuçiqi./Telegrafi/
