Procesi i ankesave për furnizimin me autobusë elektrikë ka përfunduar, pasi ankesa e paraqitur u rrëzua sot nga Komisioni i shkallës së dytë për ankesa për prokurime publike. Lajmin e bëri të ditur zëvendëskryeministri dhe ministri i Transportit, Aleksandar Nikolloski.
Të lidhura
None found
Sipas tij, tani pritet të nisë nënshkrimi i kontratës, ndërsa kërkesa ndaj ofertuesit, i cili do të jetë edhe kontraktori zyrtar i shtetit, është që 30 autobusët e parë të dorëzohen në dhjetor ose janar. Afati i dorëzimit është gjashtë muaj nga momenti i nënshkrimit të kontratës.
Nikolloski sqaroi se 60 autobusë të tjerë do të mbërrijnë brenda 12 muajve, ndërsa 60 të fundit brenda 18 muajve, duke bërë që furnizimi i të gjithë 150 autobusëve të përfundojë brenda një viti e gjysmë. Deklaratën ai e dha në “TV Sitel”.
Ndërkohë, të enjten në Qeveri u nënshkruan marrëveshjet për grantin investues të Bashkimit Evropian përmes Kornizës së investimeve për Ballkanin Perëndimor, si dhe marrëveshjet e financimit me Bankën Evropiane të Investimeve (BEI) dhe Bankën Evropiane për Rindërtim dhe Zhvillim (BERZH). Këto marrëveshje sigurojnë strukturën financiare për zbatimin e fazës së tretë të pjesës hekurudhore Kriva Palankë – fillimi i tunelit ndërkufitar me Bullgarinë, në kuadër të Korridorit hekurudhor 8.
Duke folur për këtë projekt, Nikolloski tha se është jashtëzakonisht i kënaqur me ritmin e zhvillimit të tij dhe shtoi se, nëse gjithçka vijon sipas planit, punimet intensive të ndërtimit pritet të nisin në fillim të vitit të ardhshëm.
