Tradhtia është një nga arsyet më të zakonshme për ndarjen e çifteve. Megjithatë, burrat dhe gratë e shohin tradhtie ndryshe.
Meshkujt zakonisht e marrin më seriozisht tradhtinë fizike, kur partnerja e tyre kryen marrëdhënie seksuale me dikë tjetër, sesa gratë.
Ndërsa këto të fundit marrin më seriozisht tradhtinë emocionale, kur partneri i tyre fillon një marrëdhënie intime me një person tjetër.
Të dyja gjinitë falin njësoj
Edhe pse çdo lloj tradhtie e përjetojnë ndryshe, burrat dhe gratë janë pothuajse njëlloj të gatshëm të falin partnerin e tyre, me sudimet që tregojnë se shkalla e faljes nuk lidhet me llojin e tradhtisë.
“Na bëri përshtypje kur zbuluam se dallimet mes gjinive nuk ishin aq të mëdha. Mekanizmat që motivojnë faljen janë pak a shumë identikë në të dyja gjinitë”, shpjegon profesor Leif Edëard Ottesen Kennair nga Departamenti i Psikologjisë në Universitetin e Norvegjisë, i cili ishte bashkëautor i këtij studimi të botuar në Journal of Relationships Research .
“Kërcënimi i mundshëm për marrëdhënien”
Ekipi hulumtues përfshiu në studim 92 çifte, të cilëve iu kërkua të plotësonin një pyetësor për problemet në skenarë hipotetikë ku partneri i tyre kishte kryer një lloj tradhtie.
Një skenar përshkruante partnerin duke bërë seks me një person tjetër, por që nuk e dashuronte.
Skenari tjetër, partneri bie në dashuri me dikë tjetër, por nuk bëjnë seks.
Pra, sa të gatshëm ishin pjesëmarrësit për të falur partnerët e tyre?
Siç rezulton, burrat dhe gratë e përpunojnë tradhtinë e partnerit të tyre pothuajse në mënyrë identike.
“Shumica e njerëzve, pavarësisht nga gjinia dhe lloji i tradhtisë, besojnë se nuk ka gjasa ta falin tradhtinë e partnerit. Nëse një çift divorcohet apo jo, në thelb varet nga sa kërcënuese është për marrëdhënien tradhtia që ka ndodhur. Sa më kërcënuese të jetë tradhtia, aq më keq për marrëdhënien”, shpjegon autori i parë i studimit, Trond Viggo Grøntvedt.
Të gatshëm për të falur
Nëse dy partnerët besojnë se marrëdhënia e tyre mund të vazhdojë varet gjithashtu nga sa të gatshëm janë ata të falin njëri-tjetrin, veçanërisht pa u distancuar.
Sigurisht, ka dallime të mëdha individuale, madje edhe midis njerëzve të të njëjtit seks.
“Njerëzit reagojnë ndryshe ndaj tradhtisë, në varësi të personalitetit dhe rrethanave të tyre. Shumë njerëz mund të mendojnë se çiftet që kanë një marrëdhënie të fortë do të ishin më të përgatitur për të duruar tradhtinë, por studimi ynë nuk e tregoi këtë”, thotë profesori Mons Bendixen.
Përgjegjësitë dhe tradhtia
Ka një aspekt tjetër që vjen në lojë në rastet e tradhtisë emocionale, ku nuk ka ndodhur asnjë akt seksual. Sa përgjegjësi duhet të marrë partneri për atë që ndodhi?
“Shkalla e fajit që i atribuohet partnerit shoqërohej me gatishmërinë për të falur. Marrëdhënia është më e rrezikuar nëse partneri detyrohet të marrë një pjesë të madhe të përgjegjësisë për përfundimin e një marrëdhënieje personale me një person tjetër”, thekson Dr. Bendixen.
Ndërsa përfundon: “Nëse dikush bën seks me një person tjetër, nuk ka shumë rëndësi nëse ai mendon se ishte faji i tij apo i tjetrit. Falja nuk varet nga pranimi i kësaj përgjegjësie.”
