Zjarri që ka shpërthyer në fshatin Lundër të Matit ka marrë përmasa të mëdha dhe po përhapet me shpejtësi, duke dalë jashtë kontrollit.
Flakët kanë arritur në pyllin e Trodhenit, një zonë e mbuluar me pisha të zeza, ndërsa era e fuqishme po ndihmon në zgjerimin e vatrës.
Të lidhura
None found
Terreni i vështirë dhe erërat e forta e kanë bërë pothuajse të pamundur ndërhyrjen e forcave tokësore. Për të izoluar zjarrin, ka nisur operacioni nga ajri.
Nënprefekti i Matit, Hasan Pasha, bëri të ditur se në terren janë angazhuar rreth 90 forca, përfshirë punonjës të shërbimit zjarrfikës të Burrelit, të Bashkisë Mat dhe të shërbimit pyjor.
Pavarësisht përpjekjeve për të vënë flakët nën kontroll, situata vijon të jetë kritike. Dyshohet se zjarri është vendosur qëllimisht.
Nga përhapja e flakëve rrezikohen edhe stanet në Trodhen. Forcat e angazhuara po përpiqen të izolojnë vatrën dhe të pengojnë zgjerimin e mëtejshëm të zjarrit, ndërsa e gjithë zona është mbuluar nga tymi i dendur.
