Një 36-vjeçar shqiptar ka humbur jetën gjatë natës në Baldissero d’Alba të Italisë, pasi u qëllua me armë në rrethana që lidhen me një tentativë vjedhjeje në një kantier ndërtimi.
Mediat italiane e identifikojnë viktimën si Gjovalin Lazri dhe raportojnë se ai dyshohet se ishte pjesë e një grupi prej të paktën pesë personash, të cilët kishin shkuar atje për të vjedhur materiale.
Të lidhura
None found
Sipas rindërtimit paraprak të ngjarjes, grupi kishte hyrë në pronën e 35-vjeçarit Roberto Mollo, ku ishin vendosur materiale ndërtimi, pajisje dhe mjete pune.
Mollo, i cili ndodhej i vetëm në atë moment, dëgjoi zhurma gjatë natës, mori armën dhe qëlloi disa herë drejt personave që ndodheshin jashtë.
Ndërsa pjesëtarët e tjerë dyshohet se u larguan nga vendi, Lazri u godit nga të shtënat. Ekipet e urgjencës ndërhynë menjëherë, por 36-vjeçari nuk arriti të mbijetonte.
Gjovalin Lazri jetonte prej vitesh në periferi të Torinos, së bashku me partneren dhe fëmijën e tyre. Roberta Sisimbro, avokatja e familjes, ka deklaruar se të afërmit e viktimës janë të tronditur.
Lazri kishte precedentë të mëparshëm për vepra penale kundër pasurisë, ndërsa avokatja ka thënë se ai po përpiqej të rikthehej në një jetë normale dhe punonte rregullisht. Ai administronte një lokal në Corso Taranto në Torino, ku jetonte me familjen.
