Presidentja e Republikës së Kosovës, Justina Shiroka Pula, ishte e pranishme në ceremoninë që shënoi dhjetë vjet nga themelimi i Ekipit Këshillues dhe Ndërlidhës të NATO-s në Kosovë (NALT).
Gjatë aktivitetit, ajo vlerësoi mbështetjen e NALT-it ndër vite për Ministrinë e Mbrojtjes, Forcën e Sigurisë së Kosovës dhe Agjencinë e Menaxhimit Emergjent. Kontributi, sipas saj, ka ndihmuar në ndërtimin e aftësive profesionale e të institucioneve, si dhe në forcimin e mbikëqyrjes demokratike dhe menaxhimit të emergjencave.
Të lidhura
None found
Shiroka Pula tha se synimi strategjik i Kosovës është t’i bashkohet NATO-s. Ajo përmendi gjithashtu synimin për ta zhvilluar më tej FSK-në, në mënyrë që ushtarët e saj në të ardhmen të shërbejnë përkrah forcave të vendeve aleate dhe të kontribuojnë për sigurinë e paqen e përbashkët.
Presidentja kujtoi rolin vendimtar të NATO-s në çlirimin e Kosovës më 1999, me Shtetet e Bashkuara të Amerikës në krye. Ajo shprehu mirënjohjen e vazhdueshme për këtë kontribut dhe tha se Aleanca mbetet simbol i lirisë dhe sigurisë së vendit.
Në fund, Shiroka Pula falënderoi gjeneralin Borghoff dhe pjesëtarët e NALT-it për përkushtimin dhe ndihmën e vazhdueshme, si dhe i përgëzoi për dhjetëvjetorin e ekipit.






