Prokurori Publik i Shtetit, Nenad Saveski, deklaroi për mediat se aktualisht nuk mund të japë një përgjigje të qartë nëse institucioni që drejton ka nisur veprime hetimore për rastin “Alta Banka”.
Ai bëri të ditur se Prokuroria Publike po e ndjek nga afër situatën dhe se do të ndërhyjë nëse konstatohen elemente që ngrenë dyshime për kryerjen e një vepre penale. Megjithatë, sipas Saveskit, është ende herët për të dhënë detaje konkrete.
Të lidhura
None found
“Kjo situatë, ashtu si çdo çështje me interes të veçantë për publikun, po monitorohet nga Prokuroria Publike. Nëse vërtetojmë se lidhet me një ngjarje juridike penale, do të jemi të detyruar të reagojmë. Por në këtë fazë nuk mund t’ju jap një përgjigje specifike, pasi është shumë herët”, u shpreh Saveski.
I pyetur nëse Prokuroria Publike ka kërkuar informacion nga Prokuroria e Serbisë, ku po zhvillohet një hetim që lidhet edhe me pronarin e Alta Banka, Davor Macura, Saveski tha se deri tani nuk ka pasur asnjë komunikim për këtë rast të veçantë.
“Me kolegët nga republika fqinje e Serbisë kemi një bashkëpunim shumë të mirë. Nëse do të nevojiteshin të dhëna të tilla apo komunikim me autoritetet gjyqësore të Republikës së Serbisë, kjo do të realizohej pa vështirësi”, deklaroi Saveski.
