Kryeministri Edi Rama mori pjesë në një bashkëbisedim me të rinjtë që ishin mbledhur në kampin Rin Camp 2026.
Duke iu përgjigjur pyetjeve të tyre, ai u ndal te procesi i anëtarësimit të Shqipërisë në Bashkimin Evropian dhe bëri me dije se, brenda pak ditësh, do të përfundojnë edhe tre kapitujt e parë të këtij procesi.
Të lidhura
None found
“Hapjen e negociatave na e kanë refuzuar tri herë, ndonëse Komisioni Evropian e kishte rekomanduar. Marrëdhëniet tona me Holandën, që kanë qenë më të vështirat mes vendeve të BE-së, ndryshuan tërësisht nga një ndeshje e Romës me Feyenoordin.
Mijëra njerëz dhe gazetarë erdhën dhe panë realitetin, që Shqipëria nuk ishte droga, kriminaliteti dhe ajo që thuhej. Anëtarësimi është një proces i gjithanshëm. Unë do të shkoj fillimisht në Paris për një event, më pas do të shkoj në Bruksel për të mbyllur kapitujt.
I hapëm të gjithë kapitujt në kohë rekord, sepse ishim përgatitur dhe tani do të nisë mbyllja e tyre. Tre kapitujt e parë i mbyllim më 14 korrik. Kjo është beso dhe kontrollo. PS ka një mision historik që ka ndodhur të jetë i gjithi në dorën tonë, anëtarësimi në BE.
Ky është misioni i PS dhe misioni im. E kam besuar që kur dukej e pamundur dhe jo më që tani mbërritja duket me sy. Nëse kjo do të ndodhë, historia do të sillet shumë mirë me ne”, u shpreh Rama.
