Ditën e sotme, Presidenti i Republikës së Shqipërisë, Bajram Begaj, priti Ministrin e Punëve të Jashtme dhe Evropiane të Kroacisë, Gordan Grlić-Radman, në një takim ku u diskutua mbi forcimin e marrëdhënieve dypalëshe dhe partneritetit strategjik mes dy vendeve.
Gjatë bisedës, të dy palët vlerësuan nivelin e lartë të bashkëpunimit mes Shqipërisë dhe Kroacisë, si edhe mbështetjen e vazhdueshme që Zagrebi i jep procesit të integrimit evropian të Shqipërisë.
Të lidhura
None found
Në fokus të takimit ishin edhe mundësitë për zgjerimin e bashkëpunimit në fusha si ekonomia, mbrojtja, energjia, infrastruktura dhe turizmi.
Kreu i shtetit, falenderoi Kroacinë për mbështetjen e vazhdueshme që i ka dhënë Shqipërisë në të gjitha forumet ndërkombëtare gjatë rrugëtimit drejt Bashkimit Evropian.
Gjithashtu, Begaj theksoi se kjo mbështetje mbetet një element i rëndësishëm për përparimin e procesit integrues.
Nga ana e tij, ministri kroat rikonfirmoi gatishmërinë e vendit të tij për të vijuar mbështetjen ndaj Shqipërisë në çdo aspekt të procesit të anëtarësimit në BE.
Presidenti Begaj, shprehu gjithashtu mirënjohjen për qëndrimin e Kroacisë në mbështetje të Kosovës, duke nënvizuar se bashkëpunimi mes dy vendeve është i rëndësishëm për ruajtjen e paqes, sigurisë dhe stabilitetit në rajon.
