Përleshjet midis forcave armene dhe azerbajxhanas rifilluan të mërkurën në rajonin separatist të Nagorno-Karabakh, ku u raportuan të vrarë tre ushtarë. Abc News shkruan se zyrtarët ushtarakë të Nagorno-Karabakh thanë se sulmet me dronë të kryera nga forcat Azerbajxhane vranë dy nga trupat e tyre dhe plagosën 14 të tjerë.
Ministria e Mbrojtjes e Azerbajxhanit tha se një nga ushtarakët e vendit vdiq në atë që pretendohej se ishte një “akt terrorist” nga “formacionet ilegale ushtarake armene”. Ushtria e Azerbajxhanit kreu një “operacion hakmarrës” në përgjigje, duke vrarë dhe plagosur një numër të paspecifikuar “militantësh të paligjshëm armenë”. Udhëheqësi separatist i Nagorno-Karabakut, Arayik Harutyunyan, njoftoi një mobilizim të pjesshëm ushtarak të mërkurën, duke nxitur më tej tensionet në rajon.
Armenia dhe Azerbajxhani janë bllokuar në një mosmarrëveshje dekadash mbi Nagorno-Karabakun, i cili shtrihet brenda Azerbajxhanit, por ishte nën kontrollin e forcave armene etnike të mbështetura nga Armenia që nga përfundimi i një lufte separatiste atje në 1994. Një luftë e vitit 2020 në rajon vrau më shumë se 6600 njerëz. Pas gjashtë javësh luftimesh intensive, një marrëveshje paqeje e ndërmjetësuar nga Rusia i lejoi Azerbajxhanit të rimarrë kontrollin mbi pjesë të mëdha të Nagorno-Karabakut dhe zonave përreth që kontrollonin separatistët e mbështetur nga Armenia.
Moska ka dërguar rreth 2,000 trupa që i quajti paqeruajtës në rajon. Zyrtarët në Armeni dhe Azerbajxhan shkëmbyen fajin për përleshjet e ripërtërira të mërkurën. Ministria ruse e Mbrojtjes pretendoi se ishte Azerbajxhani ai që shkeli armëpushimin e vitit 2020. Tensionet janë ngritur në kufirin e përbashkët të dy vendeve që nga maji i vitit të kaluar, kur Armenia protestoi atë që e përshkroi si një inkursion nga trupat Azerbajxhan në territorin e saj. Azerbajxhani ka këmbëngulur që ushtarët e tij janë vendosur në zonat ku kufiri ende nuk është përcaktuar. Përplasje sporadike kanë ndodhur vitin e fundit.
