Një 18-vjeçar është vënë në pranga në Belsh, pasi dyshohet se aksidentoi një 14-vjeçare teksa drejtonte një motomjet pa leje drejtimi dhe më pas u largua nga vendi i ngjarjes.
Sipas njoftimit të Policisë, aksidenti u regjistrua rreth orës 13:10, në fshatin Shalës. I riu, shtetasi me inicialet A. N., dyshohet se humbi kontrollin e motomjetit dhe goditi 14-vjeçaren, për t’u larguar më pas.
Të lidhura
None found
Menjëherë pas marrjes së njoftimit, efektivët nisën kërkimet për të zbuluar identitetin dhe vendndodhjen e drejtuesit. 18-vjeçari u identifikua dhe u lokalizua brenda një kohe të shkurtër, duke përfunduar në arrest.
E mitura u dërgua në spital, ku vijon të marrë ndihmë mjekësore.
Për 18-vjeçarin janë ngritur akuzat për “Shkeljen e rregullave të qarkullimit rrugor” dhe “Largimin nga vendi i aksidentit”. Materialet procedurale i janë përcjellë Prokurorisë për vijimin e veprimeve të mëtejshme.
