Të paktën 12 të burgosur u vranë në një burg ekuadorian pas një përplasjeje mes bandave, tha të shtunën agjencia e burgjeve SNAI.
Vrasjet shënojnë kapitullin e fundit të dhunës në burgjet e kombit të Amerikës së Jugut.
Përplasja ndodhi të premten në burgun e njohur si La Penitenciaría, në qytetin e Guayaquil, një nga më të rrezikshmit në vend, shkruan Reuters.
Ekuador është rrënuar nga trazirat e burgjeve që nga viti 2021, duke rezultuar në vdekjen e qindra të burgosurve, të cilat qeveria ia atribuon përleshjeve midis bandave të drogës që luftojnë për territor dhe kontroll.
“Nëpërmjet përdorimit të teknologjisë, u konstatua se 12 persona vdiqën”, u tha SNAI gazetarëve.
Subjekti shtoi se prokuroria dhe policia ndodhen në burg për identifikimin e trupave të pajetë.
Vitin e kaluar, një delegacion i Kombeve të Bashkuara zbuloi se dhuna në burgjet e Ekuadorit ishte shkaktuar nga neglizhenca e shtetit ndaj sistemit penitenciar.
Presidenti Guillermo Lasso, një ish-bankier konservator që po përballet me seancat e shkarkimit pas akuzave për korrupsion që ai mohon, ka luftuar për të trajtuar dhunën në rritje në Ekuador, një vend që përdoret si pikë tranziti për kokainën që lëviz drejt Evropës dhe Shteteve të Bashkuara.
Në fillim të këtij muaji, qeveria e Ekuadorit amendoi një dekret për të lejuar përdorimin civil të armëve të zjarrit dhe spraj piper, duke përmendur rritjen e pasigurisë në vendin e Amerikës së Jugut.
Përplasja e së premtes pason vrasjen e tre oficereve femra të burgut jashtë burgut në Guayaquil. Këtë javë, SNAI raportoi se gjashtë të burgosur u gjetën të varur në një nga repartet e La Penitenciaría.
Lasso ka shtuar praninë e forcave të sigurisë dhe ka shpallur vazhdimisht një emergjencë në sistemin e burgjeve në përpjekje për të kontrolluar dhunën./Albeu.com/
